ქართველი სუმოისტი ლევან გორგაძე იგივე ტოჩინოშინი სექტემბრის ბაშოს მოგებასთან ძალიან ახლოსაა. იგი ტოკიოს “რიოგოკუ კოკუგიკანში” მიმდინარე აკი ბაშოზე წაუგებლად ასპარეზობს და აქტივში უკვე 12 გამარჯვება აქვს.

ძურიოს დასავლეთის მე-5 ნომრის წოდების მქონე ტოჩინოშინმა მორიგ წარმატება აღმოსავლეთის მე-11 ნომერ ასაჰიშოსთან იზეიმა. ქართველმა მეტოქეს იორიკირით სძლია.

ისიც ვთქვათ, რომ მარცხი განიცადეს გორგაძის უახლოესმა მდევრებმა ტოკუშორიუმ და სატოიამამ. შედეგად, მათ 3-3 მარცხი მოუგროვდათ, ეს კი, იმას ნიშნავს, რომ ტოჩინოშინს პირველობისთვის დარჩენილი 3 ორთბრძოლიდან ორის მოგებაც ეყოფა.

გორგაძის მომდევნო მოწინააღმდეგე აღმოსავლეთის მე-13 ნომერი აკისეიამა იქნება, რომელსაც თანაბარი ბალანსი (6 მოგება, 6 მარცხი) გააჩნია.

სამწუხაროდ, წოდებაში დაქვეითებას ვერ აცდება ძურიოს მე-3 ნომერი გაგამარუ. თეიმურაზ ჯუღელმა მე-8 მარცხი აღმოსავლეთის მე-10 ნომერ საკიგაკესთან განიცადა და მაკე-კოში (უარყოფითი ბალანსი) დააფიქსირა. ის, თუ რამდენად დიდი იქნება გაგამარუს ვარდნა, დარჩენილ ბრძოლებზე იქნება დამოკიდებული. საინტერესოა, რომ ქართველი გოლიათი შემდეგ შერკინებას ელიტარულ მაკუუჩი დივიზიონში ჩაატარებს და მის პირისპირ აღმოსავლეთის მე-16 მაეგაშირა ტოკიტენკუ დადგება.

ცნობისთვის, მაკუუჩის ლიდერად კვლავაც მონღოლი იოკოძუნა ჰაკუჰო რჩება, რომელმაც მიჯრით მე-12 მოგება ოძეკი კისენოსატოსთან იზეიმა. “თეთრი ფენიქსის” უახლოესი მდევარი მაკუუჩის დებიუტანტი, აღმოსავლეთის მე-10 მაეგაშირა იჩინოჯოა, რომელმაც მე-11 გამარჯვება ოძეკი გოეიდოსთან გაიფორმა. 10 მოგება შერჩა იოკოძუნა კაკურიუს, რომელიც ოძეკი კოტოშოგიკუსთან დამარცხდა.