ქართველი ჩოგბურთელი ანა ტატიშვილი აშშ-ს ღია პირველობის პირველ წრეში სერბ სეხნია ანა ივანოვიჩს ეთამაშება. წლის დასკვნითი სლემტურნირის წილისყრა გუშინ შედგა და ვერ ვიტყვით, რომ საქართველოს პირველ ჩოგანს გაუმართლა – ტურნირზე მე-13 ნომრად განთესილ მეტოქესთან თამაში იოლი ნამდვილად არ უნდა იყოს.

23 წლის ტატიშვილს 2 წლით უფროს მეტოქესთან WTA-ს ტურნირების ეგიდით ერთადერთხელ უთამაშია და იმ მატჩთან ტკბილი მოგონებები ნამდვილად არ უნდა აკავშირებდეს, რადგანაც 2011 წელს ბირმინგემის ტურნირზე 1:6, 0:6 დამარცხდა.

თუმცა, უკანასკნელ ამერიკულ ტურნირებზე ქართველი ჩოგბურთელი საკმაოდ ყოჩაღად გამოიყურებოდა და არა გვგონია, სერბს ისეთივე იოლი გასეირნება ელოდეს.

ცნობისთვის, აშშ-ს ღია პირველობის ძირითადი ბადის მატჩები სტარტს 26 აგვისტოდან აიღებს, ივანოვიჩის დამარცხების შემთხვევაში კი, ტატიშვილი ამერიკელ ვარვარა ლეპჩენკოს და რუმინელ ალექსანდრა დულგერუს შორის უმჯობესს დაუპირისპირდება.

შეგახსენებთ, რომ ნიუ იორკში შარშან გამართულ ტურნირზე ტატიშვილმა ფრანგ ფორეც გაკონს, რუმინელ კირსტეას და ლუქსემბურგელ მინელას სძლია და მერვედფინალში გასვლით 280 ქულა გამოიმუშავა, შემდეგ კი მომავალ ფინალისტ ვიკტორია აზარენკასთან 2:6, 2:6 წააგო.