ქართველი ჩოგბურთელი ანა ტატიშვილი ვაშინგტონის ტურნირის (საპრიზო ფონდი 235 ათასი დოლარი) ძირითად ბადეში ჩაება და პირველი რაუნდის დაძლევის ჩინებული შანსიც ჰქონდა, თუმცა, მისი გამოყენება ვერ მოახერხა.

ტატიშვილი ფრანგ კაროლინ გარსიას 6:0, 4:1-ს უგებდა და თითქოს გამარჯვებაც შორს არ იყო, მაგრამ საქმის ბოლომდე მიყვანა ვერ შესძლო და 6:0, 6:7 (5:7), 4:6 დამარცხდა.

გვიან ღამით ქართველი ჩოგბურთელი წყვილთა ტურნირში მოსინჯავს ძალას. ტატიშვილი ბრიტანელ უოტსონთან გახლავთ შეამხანაგებული და პირველ მატჩში გერმანელ ბარტელს და ფრანგ კორნეს დაუპირისპირდება.

გამარჯვების შემთხვევაში, ქართველი და ბრიტანელი მეოთხედფინალში ძალებს კანადურ-ამერიკულ დუეტთან (ბუშარი-თაუნსენდი) მოსინჯავენ.

დონეცკში მიმდინარე 75-ათასიან ტურნირს გამოეთიშა სოფო შაფათავა. ქართველმა ჩოგბურთელმა ერთეულთა ტურნირის პირველ წრეში მე-6 ნომრად განთესილ ჩეხ კრისტინა პლისკოვას 2:6, 7:5, 6:3 მოუგო, მერვედფინალში კი სერბ ალეკსანდრა კრუნიჩთან 4:6, 6:7 (7:9) დამარცხდა.

წყვილთა შეჯიბრში შაფათავამ და უკრაინელმა ალიონა ფომინამ მე-2 განთესვის მქონე უკრაინულ-ჩეხურ დუეტთან (ბეიგელციმერი-ვორაცოვა) 2:6, 3:6 წააგეს.

გერმანიაში, ბად საულგაუს 25-ათასიანი ტურნირის კვალიფიკაციის დაძლევა ვერ მოახერხა ეკატერინე გორგოძემ. მე-16 ნომრად განთესილმა ქართველმა ჩოგბურთელმა მასპინძელი კაროლინ უებელჰოერის დამარცხების (6:4, 6:4) შემდეგ მე-4 განთესვის მქონე მექსიკელ მარსელა ზაკარიასთან 4:6, 3:6 წააგო.

იზმირის 10-ათასიანი ტურნირის საკვალიფიკაციო ბადის დასკვნით რაუნდში ავსტრალიელ პამელა ბოიანოვს ვერ გაუმკლავდა თამარ ჭალაგანიძე – 4:6, 2:6.

წყვილებში ჭალაგანიძე და ტაივანელი ლი მე-4 ნომრად განთესილ რუსულ-უკრაინულ დუეტს (დეგტიარევა-ზანოსიენკო) ეთამაშებიან.