საქართველოს პირველი ჩოგანი ანა ტატიშვილი თოვლიან მიჩიგანში იმყოფება და მიმდინარე კვირაში ძალებს მიდლენდის 100-ათასიან ტურნირზე მოსინჯავს. ქართველი ჩოგბურთელი ძირითად ბადეშია დაშვებული და მისი პირველი მეტოქის ვინაობა საკვალიფიკაციო მატჩების დასრულების შემდეგ გაირკვევა.
ისიც ვთქვათ, რომ DOW CORNING TENNIS CLASSIC-ზე პირველ ნომრად პოლონელი ურსულა რადვანსკა გახლავთ განთესილი, რომელსაც ქალთა საჩოგბურთო ასოციაციის (WTA) რეიტინგში 45-ე ადგილი უკავია. მას კვალში შვეიცარიელი რომინა ოპრანდი (94-ე) და ბელარუსი ოლგა გოვორცოვა (98-ე) უდგანან.
შტატებშივე, კალიფორნიულ რანჩო სანტა ფეში დაწყებულ ტურნირში ჩაერთო თამარ ჭალაგანიძე. FRESH START WOMEN'S OPEN-ის (საპრიზო ფონდი 25 ათასი დოლარი) საკვალიფიკაციო ბადის პირველ წრეში, მე-16 ნომრად განთესილმა ქართველმა ჩოგბურთელმა ამერიკელი რეიჩელ რიდი 6:2, 6:3 დაამარცხა და შემდეგ შეხვედრაში კიდევ ერთ მასპინძელ ჯესიკა ფაილას გაეჯიბრება.
ესტონეთის დედაქალაქ ტალინში გადაინაცვლა სოფო შაფათავამ, რომელმაც გასულ კვირაში ფრანგულ გრენობლში 25-ათასიანი ტურნირის წყვილთა თანრიგში იმარჯვა. შაფათავა Tallink Open VIII-ში პირველი განთესვით ჩაებმება.
უკვე ტრადიციულად, ანტალიის მორიგ 10-ათასიან ტურნირზე იასპარეზებენ ეკატერინე გორგოძე და სოფო ქვაცაბაია. წინასწარი ვარაუდით, გორგოძე მე-3 ნომრად იქნება განთესილი და ქვაცაბაიაც ძირითად ბადეში მოხვდება.
ამასობაში, WTA-მ განახლებული რეიტინგი გამოაქვეყნა, სადაც ქართველ ჩოგბურთელებს საგრძნობი ცვლილებები არ შეხებიათ. ჩვენებურთაგან საუკეთესო ანა ტატიშვილს 554 ქულით კვლავ 115-ე ადგილი უკავია.
115 (115). ანა ტატიშვილი – 554 ქულა; 207 (209). სოფო შაფათავა – 288; 316 (317). ოქსანა კალაშნიკოვა – 150; 407 (414). ეკატერინე გორგოძე – 99; 451 (453). მაკა ჩახნაშვილი-რანცინგერი – 81; 833 (832). სოფო ქვაცაბაია – 20; 1184 (1184). მარიამ ბოლქვაძე – 5; 1233 (1234). თამარ ჭალაგანიძე – 3;
წყვილთა რეიტინგში ქართველთაგან საუკეთესო კალაშნიკოვას 1632 ქულით 53-ე პოზიცია უკავია, ტატიშვილი 1085 ქულით 82-ეა, ხოლო შაფათავა 382 ქულით 178-ე გახლავთ.
ცნობისთვის, ამჟამად კალაშნიკოვა ყატარის დედაქალაქ დოჰაში იმყოფება და პრესტიჟულ Qatar Total Open 2014-ის (საპრიზო ფონდი 2 440 070 დოლარი) წყვილთა შეჯიბრში იასპარეზებს.
საწყის რაუნდში ოქსანა და ფრანგი კაროლინ გარსია გერმანელ კრისტინა ბარუას და ფრანგ ლაურა ტორპეს გაეჯიბრებიან. გამარჯვების შემთხვევაში, კალაშნიკოვა და გარსია 105 სარეიტინგო ქულას მიიღებენ.
