“ბარსელონას” სპორტული დირექტორი ანდონი სუბისარეტა თანამდებობას შეინარჩუნებს.

კატალონიელთა ოფიციალური ვებგვერდის ინფორმაციით, მხარეებმა პრინციპულ შეთანხმებას მიაღწიეს და სუბისარეტა კონტრაქტს კიდევ ორი წლით გაახანგრძლივებს.

მისი ამჟამინდელი ხელშეკრულება 2014 წლის ივნისში იწურება. სუბისარეტა ახალ კონტრაქტს უახლოეს დღეებში გააფორმებს.

სუბისარეტა, რომელიც ამჟამად 52 წლისაა, “ბარსაში” 1986-1994 წლებში გამოდიოდა და მისი მაისურით 410 მატჩი ჩაატრა. 1985-1998 წლებში კი მას ესპანეთის ნაკრებში 126-ჯერ უთამაშია.