“ნაპოლისა” და “რომას” გუშინდელი მატჩის მეთორმეტე წუთზე დედაქალაქელთა ჰოლანდიელმა ნახევარმცველმა კევინ სტროოტმანმა “სან პაოლოს” მინდორი ტრავმის გამო დატოვა. დღევანდელმა გამოკვლევამ კი ფეხბურთელი, მისი კლუბი და ნაკრები საგონებელში ჩააგდო – სტროოტმანს მუხლის ჯვარედინი მყესი აქვს გაწყვეტილი, ოპერაცია უნდა გაიკეთოს და მინიმუმ 6 თვით ფეხბურთს ჩამოშორდება.

“მომხდარი და ექიმთა დიაგნოზი კევინისთვის შოკისმომგვრელია. სტროოტმანი “რომასა” და ჩვენი ნაკრების საკვანძო მოთამაშეა. მან დიდი როლი შეასრულა მსოფლიოს ჩემპიონატის საგზურის მოპოვებისთვის. სამწუხაროა, ბრაზილიაში რომ ვერ გაემგზავრება”, - დანანებით ამბობს ნარინჯისფერთა თავკაცი ლუის ვან გაალი.

თანანაკრებელისადმი მხარდაჭერა “მილანის” წევრმა ნაიჯელ დე იონგმაც გამოთქვა: “საწყენია, მუნდიალზე სტროოტმანის გარეშე რომ მოგვიწევს თამაში. კევინ, გამაგრდი, დროზე გამოჯანმრთელდი, პარტნიორები შენ დაბრუნებას ველით”.

კევინ სტროოტმანმა მიმდინარე სეზონში “რომას” რიგებში 24 მატჩი ჩაატარა და 6 გოლი გაიტანა.