დღეს, 17 ივნისს, ქალთა შორის მსოფლიოსა და ევროპის ექსჩემპიონმა ანტუანეტა სტეფანოვამ (ბულგარეთი), რომელიც საქართველოში მსოფლიოს ქალთა გრან-პრის გათამაშებაში მონაწილეობის მისაღებად იმყოფება, ჩვენს ქვეყანაში აკრედიტებული დიპლომატიური მისიებისა და სამინისტროს წარმომადგენლებისთვის 12 დაფაზე ერთობლივი თამაშების სეანსი ჩაატარა. მათ შორის იმყოფებოდა საქართველოს საგარეო საქმეთა მინისტრი, ქალბატონი მაია ფანჯიკიძე. ჭადრაკის ერთობლივი თამაშის სეანსი ქართველი საერთაშორისო დიდოსტატის ზურაბ აზმაიფარაშვილის წინასაარჩევნო პროგრამის ფარგლებში ჩატარდა, რომელიც 2014 წლის აგვისტოში, ნორვეგიის ქალაქ ტრომსოში დაგეგმილ ევროპის საჭადრაკო კავშირის საპრეზიდენტო არჩევნებში აპირებს მონაწილეობის მიღებას.

შეგახსენებთ, რომ ტრომსოში, არჩევნების პარალელურად, 2014 წლის საჭადრაკო ოლიმპიადა ჩატარდება და 2018 წლის მსოფლიოს საჭადრაკო ოლიმპიადის მასპინძლობის უფლების მოსაპოვებელი კონკურსი გაიმართება. ოლიმპიადის მასპინძლობის უფლების მოსაპოვებლად კონკურსში საქართველოც მიიღებს მონაწილეობას.

ერთობლივი თამაშის სეანსის დაწყების წინ მასმედიისთვის მაია ფანჯიკიძემ, ზურაბ აზმაიფარაშვილმა და საქართველოს სპორტისა და ახალგაზრდობის საქმეთა მინისტრმა ლევან ყიფიანმა განცხადება გააკეთეს:

მაია ფანჯიკიძე: “ერთობლივი თამაშის სეანსის ჩატარებით მხარს ვუჭერთ ზურაბ აზმაიფარაშვილს, რომელიც ევროპის საჭადრაკო კავშირის საპრეზიდენტო არჩევნებში მონაწილეობს. ერთობლივი თამაშების სეანსში მეც ვაპირებ მონაწილეობას...”

ლევან ყიფიანი: “სპორტისა და ახალგაზრდობის საქმეთა სამინისტრომ დასახა გზა ქართულ ჭადრაკში ძველი დიდების დასაბრუნებლად. მადლობა ქალბატონ სტეფანოვას, რომელიც დაგვთანხმდა და აზმაიფარაშვილის მხარდამჭერ აქციაში მონაწილეობს...”

ზურაბ აზმაიფარაშვილი: “ტრომსოს 2014 წლის ევროპის საჭადრაკო კავშირის საპრეზიდენტო არჩევნებისათვის მზადება 6 თვეზე მეტია რაც დავიწყე. დროის ამ მონაკვეთში 27-მდე ქვეყანაში ვიყავი და ჩემი საარჩევნო პროგრამა გავაცანი. ბოლომდე ვიბრძოლებ, რათა ევროპის საჭადრაკო კავშირის საპრეზიდენტო არჩევნებში გავიმარჯვო”.