ზამთრის პაუზა და ცვლილებები სხვა გუნდებთან ერთად ცხინვალის „სპარტაკსაც“ შეეხო. კახი კაჭარავას გუნდი რამდენიმე ფეხბურთელმა დატოვა. კლუბთან საკონტრაქტო ვადის ამოწურვის გამო ცხინვალელები რუსთაველ ნახევარმცველებს, ვარლამ კილასონიას, კახაბერ კაკაშვილსა და გიორგი ნარიმანიძეს დაემშვიდობნენ. ასევე „სპარტაკი“ დატოვეს ფორვარდმა ვახტანგ ფანცხავამ და მცველებმა ლევან თვალავაძემ და დავით მეგრელიშვილმა, შუახაზელებმა დავით ნანიევმა და არტურ გაძაოვმა. საიჯარო ვადა ამოეწურათ ნახევარმცველებს, ნიკა კვეკვესკირს და გიორგი თექთურმანიძეს. მართალია, კვეკვესკირი თბილისის „დინამოში“ დაბრუნდა, მაგრამ, თექთურმანიძის თაობაზე ცხინვალელთა და თბილისურ კლუბს შორის მოლაპარაკება შედეგიანად დასრულდა და თექთურმანიძე მიმდინარე სეზონს „სპარტაკში“ ჩაამთავრებს.
თექთურმანიძის გარდა, „სპარტაკის“ ხელმძღვანელობამ, სეზონის ბოლომდე გააგრძელა საკონტრაქტო ვადა ორ მცველთან ლევან ჭაფოძესთან და ნიკა მგელაძესთან. თუმცა, ამ ძველი-ახალი ტრიოს გარდა ცხინვალელთა გუნდში ახალწვეულებიც არიან...
მცველებმა 23 წლის ლევან კაკუბავამ და 24 წლის დავით მაისაშვილმა, რომელთაც ეს სეზონი რუსთავის „მეტალურგში“ დაიწყეს, „სპარტაკთან“, 6+6 სისტემით, ერთწლიანი კონტრაქტები გააფორმეს. ამ ორის გარდა, კაჭარავას გუნდში კიდევ ორი ახალწვეულია – შემტევი ნახევარმცველები 23 წლის გივი იოსელიანი და 25 წლის ირაკლი ეხვაია. სხვათა შორის, „ბენდელას თასის“ გათამაშების სასტარტო ტურში, 22 იანვარს, „გაგრასთან“ გამართული მატჩი (რომელიც ცხინვალელებმა 2:0 მოიგეს) „სპარტაკის“ ახალწვეულებმაც გამორჩეულად ჩაატარეს. იოსელიანმა ანგარიში გახსნა, საბოლოო შედეგი კი მის მიერ მოპოვებული პენალტით, გუნდის კაპიტანმა თეიმურაზ შონიამ დააფიქსირა.
„სპარტაკში“ კიდევ ისაა სიახლე, რომ გუნდმა უკვე მიიღო იტალიური კომპანია Macron-ის ეკიპირება და 30 იანვარს ანთალიაში მოსამზადებელ შეკრებაზე, ახალი ეკიპირებით გაემგზავრება. შიდაქართლელები ანთალიაში 12 თებერვლამდე დარჩებიან და 4 ამხანაგურ მატჩს ჩაატარებენ. სპარინგ-პარტნიორთა ვინაობა 2-3 დღეში საბოლოოდ გაცხადდება. თურქეთში გამგზავრებამდე კი, ცხინვალელები კიდევ ერთ სპარინგს გამართავენ - „სპარტაკი“ 28 იანვარს რუსთავში ადგილობრივ „მეტალურგს“ გაეჯიბრება.
თემურ კედელაშვილი
ცხინვალის „სპარტაკის“ პრესსამსახურის ფოტო
