ფინეთის ლიგის თასის ჯგუფური ეტაპის მე-2 ტურის მატჩში, ტურკუს “ინტერის” თავდამსხმელმა ირაკლი სირბილაძემ თავი გამოიჩინა.  

“ინტერმა” სტუმრად “ტურუნ პოლოსეურა” 4:2 დაამარცხა, ხოლო ქართველმა ფეხბურთელმა სრულად ითამაშა და 85-ე წუთზე საბოლოო ანგარიში დააფიქსირა. გარდა ამისა, მან საგოლე პასი მიითვალა. მე-16 წუთზე, სოლომონ დუამ ანგარიში სწორედ ქართველის ასისტენტობის შემდეგ გახსნა. ტურკუელები A ჯგუფს, სადაც “ტურუნ პოლოსეურასთან” და “მარიეჰამნთან” ერთად გამოდიან, 6 ქულით ლიდერობენ.

საფრანგეთის ნაციონალ ლიგის (მე-3 ლიგა) მე-19 ტურში, “ლუზენაკმა”, სადაც ამირან სანაია თამაშობს, საკუთარ მოედანზე “პუარე-სურ-ვიესთან” 0:1 წააგო. ქართველმა მარცხენა მცველმა მოედანზე 90 წუთი დაჰყო. “ლუზენაკს”, რომელსაც ლიგა 2-ში დაწინაურება უნდა, 38 ქულა აქვს და 18-გუნდიან სატურნირო ცხრილში მეორეა.

სამხრეთ აფრიკის PSL-ის (უმაღლესი ლიგა) მე-17 ტურში “მოროკა სვალოუვსმა” შინ “კაიზერ ჩიფსთან” 0:2 წააგო. გიორგი ნერგაძე მასპინძელთა სასტარტოში იმყოფებოდა და 56-ე წუთზე შეცვალეს. “მოროკას” 26 ქულა აქვს და 16 გუნდში მეექვსეა.