ბოლნისის “სიონმა” გუშინწინ დაიწყო ვარჯიში და გუნდში გარკვეული ცვლილებები მოხდა. ქვემოქართლელთაგან წავიდნენ ირაკლი ლექვთაძე (თბილისის “დინამოდან” იჯარით იყო და დაბრუნდა), სერგი ორბელაძე (“მეტალურგში”), ირაკლი კლიმიაშვილი (“სკონტოში”), გალ საპირი (ისრაელში). რაც შეეხებათ გიორგი მანწკავასა და ვაჟა ნემსაძეს, მათ კონტრაქტი დაუმთავრდათ “სიონთან”.

ახალწვეულებს რაც შეეხებათ, ესენია არიან: ალეკო გოგობერიშვილი (“გურიიდან”), გიორგი ლემონჯავა (ცხინვალის “სპარტაკიდან”), გიორგი ჯოხაძე (“ზოოვეტიდან”), ზურაბ ბათიაშვილი (“მეტალურგიდან”). გოგობერიშვილი და ბათიაშვილი, როგორც იცით, ადრეც თამაშობდნენ “სიონში”.     

მიმდინარეობს მოლაპარაკება რამდენიმე ფეხბურთელთან – გუნდის გაძლიერება ფინანსებზეა დამოკიდებული და ჯერაც არაა გარკვეული, რა ოდენობის ბიუჯეტი ექნება კლუბს.

ეს ინფორმაციები “სიონის” პრესატაშე ჯემალ ჭიპაშვილმა “მსოფლიო სპორტს” აცნობა და ამასთან ერთად ისიც განუცხადა, რომ “თამაზ სტეფანიას” სტადიონის მინდორი იდეალურ მდგომარეობაშია: “ვიცი, გაგიკვირდებათ, მაგრამ მშვენიერ მდგომარეობაშია მინდორი. დიდი სამუშაოები ჩატარდა, სასუქი შეიტანეს, საფარი გაასწორეს”.

ჭიპავილმა ასევე გვაცნობა, რომ “სიონის” მთავარ მწვრთნელ არმაზ ჯელაძის თანაშემწეეები – ჯონი ჯაგიდისი და გიორგი ლოლაძე A ლიცენზიის სამწვრთნელო კურსებს გადიან. სხვათა შორის, ამ კურსებს გადის “სიონის” გენერალური დირექტორი ლადო ბურდულიც, რომელმაც ადრეც არაერთხელ თქვა, რომ სამომავლოდ მწვრთნელობა სურს.