დევისის თასის წლევანდელი გათამაშება გადამწყვეტ ეტაპზეა მისული. ნახევარფინალში ერთმანეთს შვეიცარიისა და იტალიის, ჩეხეთისა და საფრანგეთის ნაკრებები დაუპირისპირდებიან. შვეიცარიის ჩოგბურთის ფედერაციის გადაწყვეტილებით ნახევარფინალური პაექრობა ჟენევაში, სპორტკომპლექს Palexpo-ში ჩატარდება.

შეგახსენებთ, მეოთხედფინალში, როჯერ ფედერერისა და სტანისლას ვავრინკას შემადგენლობით, შვეიცარიელებმა დიდი ბრძოლის შემდეგ მოუგეს ყაზახებს (3:2), დევისის თასის მოქმედი ჩემპიონი კი ჩეხეთის ეროვნული გუნდი გახლავთ. ფრანგებისა და ჩეხების დაპირისპირებაში მასპინძლები „სამფეროვნები“ იქნებიან. მატჩის ჩატარების ქალაქი და არენა მოგვიანებით დადგინდება.

ორივე ნახევარფინალური პაექრობა 12-14 სექტემბერს გაიმართება.