ზაფხულის სატრანსფერო სეზონში, შესაძლოა, “ლივერპულის” მცველმა მარტინ შკრტელმა კლუბი შეიცვალოს. სლოვაკმა “სკაი სპორტსს” ღიად განუცხადა, რომ “ენფილდის” დატოვებაზე ფიქრობს.
“არ ვიქნები მართალი, თუ ვიტყვი, რომ წასვლაზე არ ვფიქრობ. გასულ სეზონში საკმაოდ გამიჭირდა. სეზონის მეორე ნახევარში სათადარიგოთა სკამზე ვიჯექი და ამას მიჩვეული არ ვიყავი. მიუხედავად ყველაფრისა, “ლივერპული” მსოფლიოს ერთ-ერთი საუკეთესო კლუბია და აქ 6 წელი გავატარე. ძნელია ადგე და თქვა, რომ მიდიხარ.
მიმდინარე სეზონის დაწყებამდე, ჩემს თავს ვუთხარი, რომ მაქსიმალურად უნდა მემუშავა და ჩემი შესაძლებლობები დამემტკიცებინა. დარჩენას არ ვნანობ, მაგრამ რა იქნება მომავალში, არ ვიცი”, - განაცხადა შკრტელმა.
