25 აპრილს საქართველოს ბავშვთა და ახალგაზრდობის ეროვნული ცენტრის ინიციატივით, ცენტრის სააქტო დარბაზში საქართველოს ეროვნული ნაკრების კაპიტანთან და ამერიკის ნაციონალური საკალათბურთო ასოციაციის კლუბ – “მილუოკი ბაქსის” კალათბურთელთან – ზაზა ფაჩულიასთან შეხვედრა გაიმართა.
შეხვედრას მოწვეულ სტუმრებთან – სპორტისა და ახალგაზრდობის საქმეთა მინისტრის პირველ მოადგილე – ზურაბ აზმაიფარაშვილთან და კალათბურთის ფედერაციის ვიცე-პრეზიდენტ – კახა შენგელიასთან ერთად, წეროვანში კომპაქტურად ჩასახლებული ბავშვები და სხვადასხვა სპორტული სკოლების მოსწავლეები, ასევე ზაზა ფაჩულიას ბავშვობის მწვრთნელები ესწრებოდნენ.
დაახლოებით ერთსაათიანი შეხვედრა კითხვა-პასუხის რეჟიმში წარიმართა. ზაზა ფაჩულიამ, რომელმაც ამერიკის ნაციონალურ საკალათბურთო ასოციაციაში უკვე 11 სეზონი გაატარა, ახალგაზრდებს მათთვის ყველა საინტერესო კითხვებზე გასცა პასუხი, შეხვედრის დასრულების შემდეგ კი მათ საკუთარი ავტოგრაფიანი ბურთები გადასცა და სამახსოვრო სურათები გადაიღო.
შეხვედრა ცენტრის პროექტის – “შეხვედრები სპორტსმენებთან” ფარგლებში ჩატარდა, რომლის მიზანია ახალგაზრდა სპორტსმენების ინფორმირება, ახალგაზრდებში სპორტული კულტურის ამაღლება, ახალი გამოცდილების მიღება, გამოჩენილი სპორტსმენების წარმოჩენა ახალი თაობის წინაშე, სპორტული სახეობების პოპულარიზაცია და მომავალ თაობაში ჯანსაღი ცხოვრების წესის დამკვიდრება.
სპორტისა და ახალგაზრდობის საქმეთა სამინისტროს პრესსამსახური
