საქართველოს 19-წლამდელთა ნაკრებმა მორიგი სასწაული მოახდინა და თადარიგში მინდვრის ერთი მოთამაშით დარჩენის მიუხედავად, ევროპის ჩემპიონატის ელიტ-რაუნდის მე-6 ჯგუფის მასპინძელ ბელგიას 2:0 სძლია. ეს კი, იმას ნიშნავს, რომ ქართველი 19-წლამდელები ევროპირველობის ფინალურ ეტაპზე ქართული ფეხბურთის ისტორიაში პირველად ითამაშებენ (1999 წელს ფინალში ამ გუნდის წინამორბედმა 18-წლამდელთა ნაკრებმა იასპარეზა. იტალიასთან – 1:3, ირლანდიასთან – 3:3, ესპანეთთან – 1:4).

სატურნირო მდგომარეობიდან გამომდინარე, ისეთი ვითარება გახლდათ შექმნილი, რომ ბოლო ტურში საქართველოს ნაკრებს წარმატებისთვის შესაძლოა, ყაიმიც ჰყოფნოდა, თუმცა, პირველი ტაიმის შემდეგ სიტუაცია უფრო დაიძაბა. პარალელურ შეხვედრაში ინგლისელები შოტლანდიასთან 2:0 დაწინაურდნენ, ეს კი იმას ნიშნავდა, რომ თუკი ჩვენი თამაში უგოლოდ დასრულდებოდა, ხოლო ინგლისელები ერთხელაც გაიტანდნენ, მიზანს უკვე ისინი აღწევდნენ.

სწორედ ამიტომ იყო, შესვენების შემდეგ ქართველთა შეტევები უფრო მძაფრი რომ გახდა, რამაც შედეგი მალევე მოიტანა. ანგარიშის გახსნა 56-ე წუთზე გიორგი ფანცულაიამ მოახერხა და მასვე 74-ეზე უპირატესობის განმტკიცება შეეძლო, თუმცა, ლუკა ზარანდიას წაქცევისთვის დანიშნული პენალტი გააცუდა.

საბედნიეროდ, ქართველ ფეხბურთელებზე ამას ცუდად არ უმოქმედია. პირიქით, მათYშეტევები გააგრძელეს და გურამ სამუშია ანგარიში 2:0 გახადა. მალევე ეს უკანასკნელი ქართველთა ერთადერთმა სათადარიგო მიდვრის მოთამაშე ალექსანდრე გურეშიძემ შეცვალა, დარჩენილ დროში კი საინტერესო ის იყო, რომ მატჩის შვეიცარიელმა არბიტრმა ლაშა დვალის წინააღმდეგ უხეშობისთვის მასპინძელთა მცველი ჟილ რუისენი გააძევა.

ამგვარად, ქართველმა 19-წლამდელებმა 7 ქულა მოაგროვეს და მე-2 ადგილზე გასულ ინგლისს, რომელმაც საბოლოოდ შოტლანდიელებს 3:0 სძლია, 2 ქულით გაუსწრეს. შესაბამისად, ცეცაძის ბიჭებმა ევროპის ჩემპიონატის ფინალური ეტაპის საგზური მოიპოვეს, სადაც სულ 8 ნაკრები ითამაშებს.

მათგან უკვე ცნობილია სამი გუნდის ვინაობა. ესენი მასპინძელი ლიტვა, მე-7 ჯგუფის გამარჯვებული თურქეთი (რუსეთთან – 2:1, იტალიასთან – 5:1, უკრაინასთან – 2:0) და საქართველო არიან. ელიტ-რაუნდის დანარჩენ ჯგუფებში თამაშები ჯერაც ჩასატარებელია.

აქვე ვთქვათ, რომ ფინალური ეტაპი 20 ივლისიდან 1 აგვისტომდე პერიოდში ჩატარდება, მომავალი ტურნირის კენჭისყრა კი 14 ივნისს ასევე ლიტვაში შედგება.   

ევროპის ჩემპიონატის ელიტ-რაუნდი. მე-6 ჯგუფი. KSV Bornem Stadion (ბორნემი), ბელგია

საქართველო – ბელგია 2:0 (0:0)

საქართველო: თებიძე, დვალი, სანდოხაძე (კაპ.), გეგეჭკორი, უბილავა, სამუშია (გურეშიძე, 81), ჭანტურია, ფანცულაია, ცნობილაძე, ზივზივაძე, ზარანდია.

მწვრთნელი: გიორგი ცეცაძე.

ბელგია: დოესტი, იბომა (დე ნევე, 73), რუისენი, დე სარტი (კაპ.), ფოკეტი, ვერსტრაეტე, კაბასელე (შრიივერსი, 58), შოოფსი, ატედა, ბუეკერსი (კორინი, 63), ტროსარდი.

მწვრთნელი: მარკ ვან გეერსომი.

გოლები: ფანცულაია (56), სამუშია (78).

ფანცულაია ვერ გაიტანა პენალტი (74).

გაფრთხილება: ფოკეტი (7), სამუშია (21), გეგეჭკორი (69), დე სარტი (71).

მსაჯი: საშა ამჰოფი (შვეიცარია).

KFC Oosterzonen Stadion (ვესტერლო), ბელგია

ინგლისი – შოტლანდია 3:0 (2:0)

გოლები: კოულტირსტი (17), ბეიკერი (33 პენ.), აკპომი (74).

საქართველო	3	2	1	0	6:	2		7
ინგლისი	3	1	2	0	5:	2		5
ბელგია	3	0	2	1	3:	5		2
შოტლანდია	3	0	1	2	3:	8		1