“ვიკას” შესვენებაზე სპეციალური სახვევი დაადეს და იგი სათადარიგოთა სკამზე გამოჩნდა, თუმცა, ვინაიდან ”მონტეპასკი” მატჩს იოლად იგებდა, იტალიის ჩემპიონის თავკაც ლუკა ბანკის ქართველი კალათბურთელის თამაშში ჩართვა აღარ გაურისკავს.

არადა, იმ 08:12 წუთში, რაც სანიკიძემ მოედანზე დაჰყო, იგი ერთ-ერთი საუკეთესო გახლდათ. ქართველმა ფორვარდმა 5-დან 3 ორქულიანი ჩააგდო და 6 ქულას, 4 მოხსნა (2 მეტოქის ფარზე), 1 ჩაჭრა და 1 პასი წაამატა. ვიქტორმა 1 პერსონალური ფოლი მიიღო, მის წინააღმდეგ კი ორჯერ დაჯარიმდნენ.

როგორც აღვნიშნეთ, სიენელებმა სტამბულელები ყოველგვარი პრობლემების გარეშე – 87:69 დაამარცხეს, მასპინძელთა მხრიდან კი 5 და მეტი ქულა ერთბაშად 8 კალათბურთელმა მოაგროვა. სარგებლიანობის საუკეთესო კოეფიციენტი (20) დანიელ ჰაკეტს ჰქონდა, რომელმაც 16 წუთში 13 ქულა ჩააგდო.

სანიკიძის კლუბმა მე-7 გამარჯვება იზეიმა და ესპანური “ბარსელონას” კვალად, რომელიც ტოპ-16-ის F ჯგუფში 8 მოგებით პირველ ადგილზეა, მე-2 პოზიციაზე დამკვიდრდა. 8 მარტს სინელები რუსულ “ხიმკის” ესტუმრებიან, რომელიც სწორედ კატალონიელებთან სტუმრად 69:71 დამარცხდა.

ამავე ჯგუფში მე-6 მოგება მიითვალა და მე-3 ადგილზე დამკვიდრდა გიორგი შერმადინის “ოლიმპიაკოსი”. პირეოსელები სტამბულში “ბეშიქთაშს” ესტუმრნენ და თურქულ კლუბს ტოპ-16-ში ზედიზედ მე-9 მარცხი აგემეს – 60:79.

ქართველმა ცენტრმა მოედანზე 08:32 წუთი დაჰყო და 1 ქულა, 1 მოხსნა, 1 ჩაჭრა და 1 დაფარება მიითვალა. შერმადინმა 2-დან 1 საჯარიმო ჩააგდო, ორქულიანი ააცილა, სამჯერ დაჯარიმდა, მის წინააღმდეგ კი თამაშის წესები ერთხელ დაირღვა.

“ოლიმპიაკოსის” რიგებში 16 ქულით საუკეთესო ამერიკელი ფორვარდი ჯოშ პაუელი გახლდათ. 7 მარტს პირეოსელები “ბარსელონას” უმასპინძლებენ.