სანდრო კობახიძეს “დნიპროში” შარშანაც არ ჰქონდა ხშირი სათამაშო პრაქტიკა, წლეულს კი უკრაინის პრემიერლიგის მატჩებში საერთოდ არ ჩანს. არადა, კობახიძე საქართველოს ნაკრებისთვის სტრატეგიულად მნიშვნელოვანი ფეხბურთელია და საწყენია მისი ასეთი მდგომარეობა.
“მსოფლიო სპორტი” კობახიძეს უკრაინაში დაუკავშირდა:
- უკრაინაში არეულობის გამო, “დნიპროს” ხელმძღვანელობა ელის, თუ როგორი შედეგით დავასრულებთ ჩემპიონატს და ამის მიხედვით მიიღებს გადაწყვეტილებას.
- გადაწყვეტილებას რა საკითხზე?
- ფეხბურთელების კონტრაქტებზე. რამდენიმეს უმთავრდება და ამას ვგულისხმობ. მე კიდევ 3,5 წლით მაქვს დარჩენილი. სხვა მხრივ, ყველაფერი ძველებურადაა გუნდში, მშვიდად ვემზადებით. ისე, მთლიანობაში რასაც ტელევიზორში აჩვენებენ, ცოტა გამუქებულია. ჩვეულებრივ მიდის ცხოვრება.
- უთამაშებლობაზე რას იტყვით? ძალიან დიდ ხანს გაგრძელდა.
- მომწყინდა უთამაშებლად ყოფნა და ვეცდები, სხვა გზა გამოვნახო. ასე დიდხანს ყოფნას არ ვაპირებ და თუ კიდევ გაგრძელდება, ვეცდები სხვა გუნდი მოვნახო. ფეხბურთელი ვარ და თამაში მსურს.
- რომელიმე კლუბში განათხოვრებაზე ხომ არაა საუბარი?
- კონკრეტული ჯერ არაფერია.
- აგენტი კიდევ არ გყავთ?
- არა. სანამ “დნიპროსთან” ახალ კონტრაქტს მოვაწერდი ხელს, აგენტებთან ურთიერთობა მქონდა, მაგრამ ახლა არავინ მყავს.
- აგენტის გარეშე არ გირთულდებათ საქმე?
- “დნიპროში” ისეთი დონეა, რომ ახალი ხელშეკრულების გაფორმებისას თავისუფლად ვახერხებდი პრეზიდენტთან ურთიერთობას და აგენტის ჩარევა არ გამხდარა საჭირო. კარგი ურთიერთობა მაქვს პრეზიდენტთან. თუმცა, ჩემს ახლანდელ სიტუაციაში, რა თქმა უნდა, აგენტი უფრო დამეხმარებოდა.
- ჯაბა კანკავას გმირულ საქციელზე: რაც მან კიევის “დინამოსთან” მატჩში გააკეთა, ალბათ, უფრო მეტად დაფასებული გახდებოდა კლუბში.
- ჯაბაზე იმდენი ითქვა და დაიწერა, რომ რაღა დავამატო, არ ვიცი. ვუყურებდი იმ თამაშს და ჯაბამ უსწრაფესად მოახდინა რეაქცია, ყველა ვერ შესძლებდა ამას. მართლაც რაღაც უბედურებას გადაარჩინა ოლეგ გუსევი. ამის შემდეგ, კანკავა უფრო მეტად შეუყვარდათ უკრაინაში და მეტად აფასებენ. კლუბში კი ჯაბას ისედაც არ აკლდა ავტორიტეტი, ძლიერად თამაშობს და გუნდის ერთ-ერთი წამყვანი ფიგურაა.
