სოლიგორსკის “შახტიორის” ნახევარმცველს სანდრო გურულს სურს, რომ ბელარუსის საფეხბურთო ჩემპიონატის სადებიუტო შეხვედრაში შინ ბორისოვოს ბატე დაამარცხოს. ამის შესახებ მან კლუბის ვებგვერდისთვის მიცემულ ინტერვიუში განაცხადა.
- ბელარუსის ჩემპიონის შესახებ რა იცით?
- პრინციპში, ბევრი რამ. ნანახი მაქვს ჩემპიონთა ლიგაში ბატე-მ “ბაიერნი” როგორ დაამარცხა. ძალიან კარგი გუნდია. თუმცა, შესაძლოა წელს მის შემადგენლობაში მნიშვნელოვანი ცვლილებები მოხდა? ვნახოთ.
- ყოფილი კლუბების შემადგენლობაში ბორისოვოელებთან გითამაშია?
- 2010 წელს თურქეთში შეკრებაზე, როდესაც ლვოვის “კარპატში” გამოვდიოდი. მაშინ, მეტოქემ მაღალი სათამაშო დონე და საკმაოდ კარგი ტექნიკა აჩვენა. ძალიან ჭკვიანურად თამაშობდნენ. მახსოვს, იმდენი ვირბინე, რომ მატჩის ბოლოს მოედანზე დავწექი.
- როგორ ფიქრობ, ხომ არ ჯობდა, რომ ბატე-ს გროდნოში მოეგო? ახლა უფრო გაბრაზებული იქნება.
- რას იზამ, ფეხბურთში ყველაფერი ხდება. არა აქვს მნიშვნელობა ბატე-ს ვეთამაშებით თუ სხვა გუნდს, მე ყოველთვის მხოლოდ გამარჯვებისთვის ვემზადები. თასის 1/4-ფინალში წარმატებამ თავდაჯერება შეგვმატა: კარგ მდგომარეობაში ვართ და საუცხოო განწყობით ვემზადებით. იმედია, გულშემატკივრები დადებითი შედეგის მიღწევაში დაგვეხმარებიან. სხვათა შორის, მსურს მათ მადლობა გადავუხადო ცოტა ხნის წინ ბაზაზე შეხვედრისთვის და “ბელშინასთან” მხარდაჭერისთვის. მხოლოდ ერთი მსურს: “შახტიორის” მატჩებზე რაც შეიძლება მეტი ქომაგი იყოს.
- “შახტიორს” დიდი ხანია ბატე არ დაუმარცხებია...
- ამის გაკეთება ძალიან მსურს, რადგან ასეთი გამარჯვებები ძალიან მნიშვნელოვანია, მითუმეტეს, ჩემპიონატის დასაწყისში. იმედია, კარგ ფეხბურთს ვაჩვენებთ. საერთოდ, ისეთ მეტოქეებთან თამაში მიყვარს, რომლებიც პირველი ადგილისთვის იბრძვიან.
- მარცხენა ფლანგზე იურევიჩთან წყვილში თავს როგორ გრძნობთ?
- საერთო ენა თურქეთში ჩატარებულ პირველივე სპარინგში გამოვძებნეთ. ის გამოცდილი ფეხბურთელია, რომლის გვერდით თამაში ადვილია. როდესაც რაიმე მეშლება, ის ყველაფერს ხედავს, აკონტროლებს და სწორ მიმართულებას მაძლევს.
- “შახტიორის” კაპიტანი მატჩისთვის განსაკუთრებით ემზადება? რაც არ უნდა იყოს, სოლიგორსკში ბორისოვოდან დაბრუნდა...
- ვფიქრობ, ასეა. ეს სავსებით ნორმალური მოვლენაა. როდესაც თურქეთში “შახტიორის” შემადგენლობაში “კარპატისთან” ვთამაშობდი, ვცდილობდი ყველგან და ყველასთვის მიმესწრო.
- ახალ საცხოვრებელ ადგილს როგორ მიეჩვიეთ?
- ბაზა ძალიან მომეწონა. რამდენიმე დღის წინ კი, საცხოვრებელი ბინა შევიგულე საკმაოდ სასიამოვნო რაიონში. ოჯახის ჩამოყვანას ვაპირებ, რომ ფეხმძიმე მეუღლემ აქ იმშობიაროს.
- საფრანგეთში, უკრაინასა და საქართველოში გითამაშია. ბელარუსთან რა პარალელს გაავლებდი?
- ამაზე საუბარი ჯერ ნაადრევია. ჩვენ “ბელშინას” ვეთამაშეთ და სუსტი გუნდი არ იყო. ვფიქრობ, სხვა გუნდებიც ძლიერები იქნებიან. ეს კარგია, რადგან საინტერესო ჩემპიონატი იქნება.
- გია გურული წარმატებული თავდამსხმელი იყო. მამას არასოდეს გადარებდნენ?
- საქართველოში მუდმივად. მამა კარგი ფეხბურთელი იყო და სამშობლოში ყველა აფასებს. რა თქმა უნდა, მსურს მასზე უფრო ძლიერად ვითამაშო, მაგრამ ძნელია. ნეტავ, ისე ვთამაშობდე როგორც ის.
