მადრიდის “რეალის” პორტუგალიელმა ლიდერმა კრიშტიანუ რონალდუმ, ევროპის მთავარი საკლუბო ტურნირის ბომბარდირულ მიღწევებში ახალი თამასა დააწესა.
მადრიდის “ატლეტიკოსთან” ლისაბონში 4:1 მოგებული ფინალური მატჩის დამატებული დროის მიწურულს გატანილი თერთმეტმეტრიანი, ჩემპიონთა ლიგის ამ გათამაშებაში, 29 წლის ფეხბურთელისთვის მე-17 გოლი იყო. რონალდუმ ამით საკუთარი წლევანდელი მიღწევა გააუმჯობესა, თორემ “ბარსელონას” არგენტინელი შემტევის, ლიონელ მესის მიერ 2011/2012 წლების სეზონში დამყარებული რეკორდი (14 გოლი), პორტუგალიელმა “ბაიერნთან” ნახევარფინალურ დაპირისპირებაში მოხსნა.
ჩემპიონთა ლიგის ამ გათამაშების ბომბარდირთა სია ასე გამოიყურება:
- კრიშტიანუ რონალდუ (“რეალი”) - 17
- ზლატან იბრაჰიმოვიჩი (პსჟ) - 10
- დიეგო კოსტა (“ატლეტიკო”) - 8
- ლიონელ მესი (“ბარსელონა) - 8
- სერხიო აგუერო (“მანჩესტერ სიტი”) - 6
- რობერტო ლევანდოვსკი (“დორტმუნდი”) - 6
აღსანიშნავია, რომ რონალდუ და მესი სწრაფი ტემპებით ეწევიან ჩემპიონთა ლიგის ისტორიაში საუკეთესო ბომბარდირ რაულ გონსალესს, რომელსაც “რეალისა” და “შალკეს” მაისურით ჯამში 71 გოლი აქვს გატანილი, მისი მდევრების ანგარიშზე კი, 67-67 ზუსტი დარტყმაა. გამომდინარე იქიდან, რომ რაული აღარ თამაშობს, დიდი ალბათობით, ბომბარდირი მომავალ სეზონშივე შეიცვლება.
