საფრანგეთის ღია ჩემპიონატის პირველ რაუნდში მოულოდნელობები გრძელდება. სტანისლავ ვავრინკას შემდეგ ტურნირს გრიგორ დიმიტროვი და ნა ლი გამოეთიშნენ.

ივო კარლოვიჩთან შეხვედრაში დიმიტროვმა ხორვატს წინააღმდეგობა ვერ გაუწია და სამ სეტში 4:6, 5:7, 6:7 დამარცხდა.

შეხვედრა ორ საათს გაგრძელდა. ივო კარლოვიჩმა პირველი და მეორე სეტი თითო ბრეიკის მეშვეობით მოიგო და სეტებში 2:0 დაწინაურდა.

გადამწყვეტ მესამე სეტში შეხვედრა თანაბარ ბრძოლაში მიმდინარეობდა და მატჩის ბედი ტაიბრეიკში გადაწყდა, სადაც უფრო იღბლიანი კარლოვიჩი აღმოჩნდა. საერთო ჯამში ხორვატმა 22 ეისი მოაწოდა, ხოლო დიმიტროვმა - 11.

აღსანიშნავია, რომ ბულგარელი მსოფლიო რეიტინგში 12-ე ადგილზეა, ხოლო კარლოვიჩი 37-ზე. ხორვატმა ჩოგბურთელმა ურთიერთშეხვედრებში ანგარიში 2:1 გახადა. ორი კვირის წინ აღნიშნული მეტოქეები ერთმანეთს რომის მასტერსზეც შეხვდნენ, სადაც დიმიტროვმა მეორე რაუნდში მეტოქე 7:6, 6:4 დაამარცხა.

"როლან გაროსის" შემდეგ ეტაპზე კარლოვიჩის მეტოქე ჰაიდერ-მაუერსა და ბრანდსის შორის გამარჯვებული იქნება.

სენსაციური მარცხი განიცადა ქალთა შორის მსოფლიოს მეორე ჩოგანმა ნა ლიმ. ჩინელმა ჩოგბურთელმა 103-ე ადგილზე მყოფ ფრანგ კრისტინა მლადენოვიჩთან მატჩი სამ სეტში 5:7, 6:3, 1:6 დათმო.

21 წლის ფრანგი ჩოგბურთელის შემდგომი მეტოქე ამერიკელი ალისონ რისკე იქნება, რომელსაც ქალთა საჩოგბურთო კლასიფიკაციაში 45-ე ადგილი უკავია.

გიორგი ბალახაძე