ინგლისის “ლივერპული” ახლა ინდონეზიაში იმყოფება შეკრებაზე და როგორც ამბობენ, გაუსაძლისი სიცხის მიუხედავად, ნაყოფიერად ვარჯიშობს. ამასობაში “წითლების” ბანაკში მთავარ ინტრიგად ისევ ლუის სუარესის წასვლა-დარჩენის საკითხი რჩება. მენეჯერ ბრენდან როჯერსს მიაჩნია, რომ ურუგვაელი ახალ სეზონს ისევ “ლივერპულში” დაიწყებს.

“ლუისი გუნდისთვის ძალიან მნიშვნელოვანი მოთამაშეა და იმედია, მომავალ სეზონსაც ჩვენთან გაატარებს”, - განაცხადა როჯერსმა ჯაკარტაში გამართულ პრესკონფერენციაზე.

როჯერსს ფეხბურთელთან ყოველდღიური კომუნიკაცია ჰქონია და ამიტომაც იმედოვნებს, რომ 26 წლის ურუგვაელი არსად წავა. მისი შეძენის ყველაზე რეალური კანდიდატები კი მადრიდის “რეალი” და ლონდონის “არსენალი” არიან.

სუარესი გუნდს მომავალ კვირაში მეორე მოსამზადებელ ეტაპზე, მელბურნში შეუერთდება.