მსოფლიო რეიტინგის მეორე ჩოგანმა, შვეიცარიელმა როჯერ ფედერერმა ძალზე ადვილად გადალახა მადრიდში მიმდინარე მასტერსის მეორე რაუნდი, დაამარცხა რა 2 სეტში ვეტერანი ჩეხი ჩოგბურთელი რადეკ შტეპანეკი - 6:3, 6:3.

მატჩი 1 საათსა და 21 წუთს გაგრძელდა და ამ დროის განმავლობაში,  როჯერის ანგარიშზე 4 ბრეიკი, ერთი ეისი და ორი ორმაგი შეცდომა გახლდათ. შტეპანეკმა 8 ბრეიკპოინტიდან მხოლოდ ერთის რეალიზება შეძლო, ჩეხის ანგარიშზე ასევე 1 ეისი და ამდენივე ორმაგი გახლდათ.

დღევანდელი მატჩი, ამ ჩოგბურთელთა ურთიერთდაპირისპირებათა ისტორიაში რიგით მეთოთხმეტე გახლდათ, რომელშიც შვეიცარიელმა მეთორმეტე გამარჯვება იზეიმა. ტურნირზე, "მხიარული როჯერის" მომდევნო მეტოქე იაპონელ კეი ნიშიკორისა და პოლონელ ეჟი იანოვიჩს შორის გაირკვევა.