მსოფლიო რეიტინგის მე-3 ჩოგანმა როჯერ ფედერერმა დამაჯერებელი სტარტი აიღო საფრანგეთის ღია პირველობაზე. ტურნირის პირველ რაუნდში ლეგენდარულმა შვეიცარიელმა ყველანაირი პრობლემების გარეშე დაამარცხა 21 წლის ესპანელი პაბლო კარენო ბუსტა - 6:2, 6:2, 6:3 და მომდევნო ეტაპის საგზურიც მოიპოვა.

მატჩი 1 საათსა და 22 წუთს გაგრძელდა და ამ დროის განმავლობაში "მხიარულმა როჯერმა" 7 ბრეიკპოინტიდან ყველა წარმატებით გამოიყენა, 10 ეისი ჩააწოდა, 33 ვინერსი შეასრულა და 19 უნებლიე შეცდომა დაუშვა, მისმა მეტოქემ კი 3 ბრეკპოინტიდან მხოლოდ 1 მათგანი გარდასახა მოგებულ გეიმად, 3 ორმაგი შეცდომა დაუშვა და 1 ეისიც ჩააწოდა.

დღევანდელი შეხვედრა ამ ჩოგბურთელთა ურთიერთდაპირისპირებათა ისტორიაში სადებიუტო გამოდგა და როჯერი დაწინაურდა - 1:0.

როლან გაროსის მეორე წრის შეხვედრას ფედერერი ზეგ გამართავს და მისი მეტოქე ინდოელ სომდევომ დევარმანსა და ესპანელ დანიელ დე ლა ნავას შორის გამარჯვებული იქნება.