რობერტო კარლოსი 1996-2007 წლებში თამაშობდა მადრიდის “რეალში”, მომდევნო 2 სეზონის განმავლობაში კი სტამბოლის “ფენერბახჩეში” ბურთაობდა. ამიტომაც არაა გასაკვირი, რომ “რეალისა” და “გალათასარაის” ჩემპიონთა ლიგის დღევანდელი მეოთხედფინალური პაექრობის წინ პოპულარული თურქული გამოცემა Milliyet სწორედ მახაჭყალის “ანჟის” ამჟამინდელ დირექტორს დაუკავშირდა.  

 - რა პროგნოზს გააკეთებთ მადრიდის “რეალისა” და სტამბოლის “გალათასარაის” მეოთხედფინალური ასპარეზობების წინ?

- პრაქტიკულად ნებისმიერი საფეხბურთო ასპექტით, უპირველესად, ტაქტიკური განსწავლულობითა და შემადგენლობის სიძლიერით მადრიდელები სტამბოლელებს ჯობნიან. თუმცა, “რეალს” ხელაღებით აშკარა ფავორიტად ვერ შევრაცხავდი. “გალათასარაი” მეტად გამოცდილი გუნდია და მის რიგებს საქვეყნოდ აღიარებული ფეხბურთელები იცავენ. ამასთან, ჩემპიონთა ლიგის მეოთხედფინალში იოლი მოწინააღმდეგე არ არსებობს.

- მას შემდეგ, რაც წილისყრამ ერთმანეთს “რეალი” და “გალათასარაი” შეახვედრა, გულშემატკივრები ამ გუნდების მთავარი მწვრთნელებს ჟოზე მოურინიოსა და ფათიხ თერიმს ადარებენ. თქვენ რომლის სასარგებლოდ გააკეთებთ არჩევანს?

- არაეთიკურად მიმაჩნია მოურინიოსა და თერიმის შედარება. პირადად მე ორივეს დიდ პატივს ვცემ. ერთიცა და მეორეც ცოცხალი ლეგენდები არიან და თავიანთი მრავალწლიანი მოღვაწეობის პერიოდში ყველად დაუმტკიცებს, უმაღლესი რანგის სპეციალიოტები რომ არიან.

- როგორ გგონიათ, ჟოზე მოურინიო “რეალისთვის” შესაფერისი დამრიგებელია?

- მოურინიოს ჩემი დახასიათება ნაკლებად სჭირდება. მან ძალიან კარგად იცის გუნდის მომზადება უახლოესი მატჩისთვის და შორეული პერსპექტივის დასახვა-შესრულებაც შეუძლია. ბევრი ამტკიცებს, რომ სეუ ჟოზე პლანეტის საუკეთესო მწვრთნელია და ამ თვალსაზრისს მეც ვიზიარებ.

- “რეალში” ათეულ წელზე მეტი გაქვთ გატარებული. გუნდის დღევანდელ მდგომარეობასაც კარგად იცნობთ?

- მადრიდში შეძლებისდაგვარად ჩავდივარ ხოლმე, უმალ “რეალის” ბაზას მივაშურებ და თამამად შემიძლია განვაცხადო - მწვრთნელები და ფეხბურთელები ერთ მუშტად არიან შეკრულნი, მეტად მონდომებით მუშაობენ, რაც პირადად ჩემთვის სასიამოვნო დასკვნის გაკეთების საშუალებას იძლევა: “რეალი” სწორ გზაზეა და სამომავლოდაც ბევრს მიაღწევს.

- “გალათასარაის” როგორ დაგვიხასიათებდით?

- გასულ სეზონში “ყვითელ-წითლებმა” დიდი ნაბიჯი გადადგეს წინ. დიდიე დროგბასა და ვესლი სნეიდერის დამატების შემდეგ კი “გალათასარაი” ნებისმიერი გრანდისთვის მეტად საშიში მოწინააღმდეგე გახდა. თერიმის გუნდი განსაკუთრებით ძლიერი სტამბოლშია, სადაც ექსპანსიური ქომაგების მხურვალე მხარდაჭერა გარანტირებული აქვს და თუკი “რეალმა” “სანტიაგო ბერნაბეუზე” უპირატესობას ვერ მიაღწია, განმეორებით მატჩში ძალიან გაუჭირდება სასურველი შედეგის მიღწევა.

- “რეალის” შემადგენლობაში თუ მოგიწიათ “გალათასარაის” წინააღმდეგ გამოსვლა?

- 2001 წელს სტამბოლელებს ჩემპიონთა ლიგის მეოთხედფინალში შევხვდით. გასვლაზე 2:3 დავმარცხდით, მადრიდში კი დამაჯერებელი რევანში (3:0) ავიღეთ. იმ მატჩებს სიამოვნებით ვიხსენებ – მაშინ ხომ ბრწყინვალე გუნდში ვთამაშობდი. თუმცა, უნდა ვაღიარო: ამჟამინდელი “რეალი” ჩემი პერიოდისას ჯობია. გუნდი უფრო სოლიდურადაა დაკომპლექტებული და მეტად ორგანიზებულად თამაშობს.