Corriere dello Sport-ის ცნობით, რომის “ლაციოში” მისი ყოფილი მწვრთნელის - ედოარდო რეიას დაბრუნების საკითხი გადაწყვეტილი ამბავია და ამის შესახებ ოფიციალური განცხადება დღეს გაკეთდება.
68 წლის სპეციალისტი კონტრაქტს ნახევარი წლით გააფორმებს. შეთანხმებაში იქნება ჩადებული პუნქტი, რომლის მიხედვითაც ხელშეკრულება ავტომატურად გახანგრძლივდება, თუ “ლაციო” სერია A-ში ევროპის ლიგაზე გამსვლელ ადგილს დაიკავებს, ან ამ ტურნირის მოგებას მოახერხებს. შეგახსენებთ, რომ ევროპის ლიგის წლევანდელ გათამაშებაში რომაულმა კლუბმა ჯგუფური ეტაპი გადალახა და 1/16-ფინალში ბულგარულ “ლუდოგორეცს” ეთამაშება.
მისი თანაშემწე სიმონე ინძაგი იქნება. რეია “ლაციოს” 2010 წლის თებერვლიდან 2012 წლის ივნისამდე წვრთნიდა და მას შემდეგ აღარსად უმუშავია. აღსანიშნავია, რომ რომაული კლუბის ხელმძღვანელობას ბოსნიელი ვლადიმირ პეტკოვიჩის გადადგომის შესახებ ოფიციალური განცხადება ჯერ არ გაუკეთებია.
