მადრიდის “რეალის” მთავარი მწვრთნელი კარლო ანჩელოტი გუნდიდან სამი ხედირას გაშვებას არ აპირებს. აღნიშნულ ინფორმაციას Goal.com ავრცელებს.

ცნობილია, რომ გერმანელი საყრდენი ნახევარმცველის შეძენა ლონდონის “არსენალს” სურს, მაგრამ მადრიდელები ფეხბურთელთან ხელშეკრულების გახანგრძლივებას ცდილობენ, რადგან სამის მოქმედი კონტრაქტი სამეფო კლუბთან 2015 წლის ზაფხულში იწურება.

“ხედირა არსად მიდის. ის “რეალის” ფეხბურთელია და კლუბთან კონტრაქტი აკავშირებს. ამ დროისთვის, სხვას ვერაფერს გეტყვით”, - განაცხადა იტალიელმა სპეციალისტმა.

შეგახსენებთ, რომ “არსენალის” გარდა, სამის შეძენა მიუნხენის “ბაიერნსაც” სურს. გუშინ კი გავრცელდა ინფორმაცია, რომ ხედირა მომავალ სეზონს “რეალის” შემადგენლობაში გაატარებს, შემდეგ კი, თავისუფალი აგენტის სტატუსით ყოფილ დამრიგებელს - ჟოზე მოურინიოს შეუერთდება და “ჩელსის” მაისურს მოირგებს.

ლევან გოგოტიშვილი