იტალიური “ნაპოლის” მთავარი მწვრთნელი რაფაელ ბენიტესი მადრიდის “რეალიდან” არგენტინელი ფორვარდის - გონსალო იგუაინის შეძენით უზომოდ კმაყოფილია.
53 წლის სპეციალისტმა Corriere dello Sport-ისთვის მიცემულ ინტერვიუში 25 წლის ფორვარდის მიმართ საქებარი სიტყვები არ დაიშურა.
“სწორედ ისეთი ფეხბურთელი გვჭირდებოდა, როგორიც იგუაინია. დიდი ხნის განმავლობაში ვეძებდით ხარისხიან ფორვარდს, რომელსაც უმაღლეს დონეზე თამაში შეუძლია. მადრიდის “რეალიდან” ისეთი ფეხბურთელი შევიძინეთ, რომელსაც უამრავი გოლი აქვს გატანილი. ის დიდებულად მოერგება ჩვენი გუნდის შემტევ სქემას. მთელი კლუბი ერთად ვმუშაობდით, რათა ის ფეხბურთელები შეგვეძინა, რომლის დამატებაც აუცილებელი იყო. ჩვენ ვარჩევდით ისეთ მოთამაშეებს, რომლებიც “ნაპოლის” მომდევნო სამი-ოთხი წლის განმავლობაში დაეხმარებიან. ისეთი კლუბებიდან მოსული ფეხბურთელები, როგორებიც “რეალი”, პსვ და “ლივერპული” არიან, ჩვენ აუცილებლად გაგვაძლიერებენ. უკვე გვყავს ბრწყინვალე შემადგენლობა, მაგრამ ამაზე შეჩერებას არ ვაპირებთ. ასეთი შენაძენები “ნაპოლის” სერიოზული ნახტომის გაკეთებაში დაეხმარება”, - ახსნა გუნდში შექმნილი სიტუაცია ბენიტესმა.
“ნაპოლიმ” ედინსონ კავანის პსჟ-ში გაყიდვის შემდეგ, ზაფხულის სატრანსფერო პერიოდში იგუაინის გარდა ხოსე რეინა, მერტენსი, რაულ ალბიოლი, ხოსე კალიეხონი და რაფაელი შეიძინა. ახალი მოთამაშეების ოფიციალური წარდგენა ორშაბათს იგეგმება.
