ესპანელი ჟურნალისტები “ბარსელონას” ახალგაზრდა ნახევარმცველის, ტიაგოს “რეალში” შესაძლო გადასვლის საკითხს აქტიურად განიხილავენ.

22 წლის ფეხბურთელს კატალონიურ კლუბთან კონტრაქტი კიდევ 2 სეზონის განმავლობაში აკავშირებს, მაგრამ საკუთარი მომავალი თავად ტიაგოს ხელშია. მხარეებს შორის არსებული შეთანხმების მიხედვით, ტიაგოს გამოსასყიდი თანხა 90 მილიონი ევროა, მაგრამ იმის გამო, რომ ფეხბურთელმა მოედანზე კონტრაქტით გათვალისწინებული დრო არ დაჰყო, გამოსასყიდი თანხა 18 მილიონამდე შემცირდა.

ბოლო დროს გავრცელებული ინფორმაციის თანახმად, ტიაგოს შეძენის სურვილს “მანჩესტერი” და “რეალი” გამოთქვამენ, ხოლო RAC1-ის ცნობით, ფეხბურთელი მზადაა “რეალში” გადავიდეს.

თავად ტიაგოს თქმით, ის, თავის მომავალთან დაკავშირებით, გადაწყვეტილებას ევროპის 21-წლამდელთა ჩემპიონატის დასრულების შემდეგ მიიღებს.