ყაზახეთის დედაქალაქ ასტანაში მიმდინარე 10-ათასიან ტურნირებს, როგორც ვაჟთა, ასევე ქალთა შორის, ქართველი ნახევარფინალისტები ჰყავს.

ქალებში მე-2 ნომრად განთესილმა სოფო ქვაცაბაიამ მე-6 რეიტინგის მქონე უზბეკი არინა ფოლტსი 6:1, 6:0 გაანადგურა და ფინალის საგზურს “უაილდ ქარდის” მქონე რუს იულია ბრიზგალოვას გაეჯიბრება.

მე-2 ნახევარფინალში რუსი შაფიროვა და უზბეკი ეკშიბაროვა ითამაშებენ.

ვაჟთა ტურნირის მეოთხედფინალში გიორგი ცივაძემ რუსი ვლადიმირ პოლიაკოვი 6:1, 6:4 დაამარცხა და მე-3 ნომრად განთესილ იარასლაუ შილასთან ჭიდილი ელის. შეგახსენებთ, რომ ცივაძემ ასპარეზობა საკვალიფიკაციო ბადიდან დაიწყო.

ფინალის მე-2 საგზურისთვის ყირგიზი დულდაევი და უზბეკი ისმაილოვი იბრძოლებენ.