ქართველმა ჩოგბურთელმა სოფო შაფათავამ რუსეთის დედაქალაქ მოსკოვში მიმდინარე საერთაშორისო ტურნირის (საპრიზო ფონდი 25 ათასი დოლარი) მეოთხედფინალში გააღწია.

მე-5 ნომრად განთესილმა შაფათავამ მერვედფინალში კვალიფიკაციის ერთ-ერთი გამარჯვებული – რუსი ანასტასია ფროლოვა 1:6, 6:4, 7:5 დაამარცხა და მომდევნო რაუნდში პირველი რეიტინგის მქონე ბელარუს ალიაკსანდრა სასნოვიჩს გაეჯიბრება.

თუკი სოფომ მეოთხედფინალშიც იმარჯვა, ფინალის საგზურისთვის რუსეთის სახელით მოთამაშე ჩოგბურთელებს – ქართველ მაია კაციტაძეს და სომეხ მარგარიტა გასპარიანს შორის გამარჯვებულს დაუპირისპირდება.

ანტალიის 10-ათასიან ტურნირზე წარმატებულად ასპარეზობს ეკატერინე გორგოძე. მე-2 განთესვის მქონე ქართველმა ჩინელ ქსიაორინგ დონგს 6:3, 6:1 მოუგო და მეოთხედფინალში რუმინელ ნიკოლეტ-კატალინა დასკალუს ეთამაშება. რაც შეეხება სოფო ქვაცაბაიას, იგი ასევე ჩინელ ჟაოქსუან იანგს ვერ გაუმკლავდა – 4:6, 7:5, 1:6.

წყვილებში მე-3 ნომრად მიჩნეულმა დუეტმა ქვაცაბაიას და ავსტრიელი პია კონიგის შემადგენლობით, უკრაინელი ოლენა კირპოტი და სლოვენიელი ტიასა სრიმპფი 7:5, 6:0 დაამარცხა და ნახევარფინალში გააღწია.

მომდევნო რაუნდში ქვაცაბაია და კონიგი ჩინელებს – დონგს და ლინ ჟუს ეთამაშებიან, რომელთაც მეოთხედფინალში გორგოძის და რუმინელი დიანა ბუზეანის მე-2 განთესვის მქონე წყვილს 3:6, 6:4, 10:6 სძლიეს.