ყაზახეთის დედაქალაქ ასტანას 10-ათასიანი ტურნირის განაცხადში 3 ქართველი ჩოგბურთელი გახლდათ, რომელთაგან ბრძოლას 2 აგრძელებს.

გიორგი ცივაძე საკვალიფიკაციო ბადეში მე-4 ნომრად იყო განთესილი და მისი დაძლევა მოახერხა. ცივაძემ რუსი ალექსანდერ იარკოვი 6:2, 6:3 დაამარცხა, შემდეგ კი უზბეკ გრიგორი რეიტმანს 6:4, 7:6 (7:5) სძლია. ძირითად ბადეში ცივაძე “უაილდ ქარდის” მქონე ყაზახ სერიჟან იესენბეკოვს გაეჯიბრება.

სამწუხაროდ, მიზანს ვერ მიაღწია გიორგი ჯავახიშვილმა, რომელსაც მე-2 განთესვა ჰქონდა. მან ყაზახ ჟანსულტან ჩემბოტაიევს კი მოუგო (6:3, 6:1), თუმცა, რუს ნიკიტა მატვეიკოს ვეღარ გაუმკლავდა – 3:6, 6:2, 3:6.

ძირითად ბადეში პირდაპირ გახლდათ დაშვებული ალექსანდრე მეტრეველი. მე-4 რეიტინგის მქონე ქართველი ჩოგბურთელი კიდევ ერთ “უაილდ ქარდის” მქონე ყაზახს – კაისარ ბეკიმოვს დაუპირისპირდება.

წყვილთა ტურნირში ცივაძემ და ყაზახმა რომან ხასანოვმა უზბეკი ახმადალიევი და ხსენებული ბეკიმოვი 6:3, 6:3 დაამარცხეს და მეოთხედფინალში მე-2 რეიტინგით მოასპარეზე რუსულ-უზბეკურ ტანდემს (ფუფიგინი-შოფაიზიევი) ეთამაშებიან.

თავის მხრივ, ჯავახიშვილი და ყაზახი ტიმურ ხაბიბულინი უმთავრეს ფავორიტებად მიჩნეულ ბელარუსულ წყვილთან (შილა-ვასილევსკი) დაიჩაგრნენ – 1:6, 4:6.