პარიზული გრანდი – პსჟ - ევროტურნირებში წარმატების მიღწევის მიზნით შემადგენლობის გაძლიერებაზე ფიქრს განაგრძობს და თვალი რომის “ლაციოს” ბრაზილიელ ლიდერ ერნანესს დაადგა.

“სან-პაულუს” აღზრდილი ფეხბურთელი იტალიაში მესამე სეზონს ატარებს და “არწივების” ლიდერად იქცა. ამ ხნის განმავლობაში 28 წლის ნახევარმცველმა სერია A-ში ჩატარებულ 101 მატჩში 30 გოლი გაიტანა.

Mercato365-ის ინფორმაციით, პსჟ სერიოზულად გეგმავს ნახევარდაცვის ხაზის ამ კრეატიული ბრაზილიელით გაძლიერებას და მას არც ერნანესის სოლიდური სატრანსფერო ღირებულება აშინებთ - დაახლოებით 30 მილიონი ევრო.

მომავალ კვირაში საფრანგეთის ჩემპიონის წარმომადგენლები “ლაციოს” დირექტორ იგლი ტარეს შეხვდებიან და მასთან ბრაზილიელის ტრანსფერის შესაძლებლობას განიხილავენ. ერნანესს, რომელიც ამჟამად ბრაზილიის ეროვნულ ნაკრებთან ერთად კონფედერაციათა თასზე თამაშობს, რომაელებთან კონტრაქტი კიდევ ორი წელი აკავშირებს.