“პარი სენ ჟერმენის” მესაკუთრე ნასერ ალ ხელაიფი ირწმუნება, რომ მისი გუნდის მთავარი მწვრთნელი ლორან ბლანი ფრანგულ კლუბში მომდევნო სეზონშიც დარჩება.

გასულ კვირაში, პსჟ-მ ჯერ “ჩელსისთან” 0:2 წააგო, რამაც პარიზული კლუბის ჩემპიონთა ლიგიდან გამოვარდნა გამოიწვია, შემდეგ კი, ბლანის შეგირდები, ლიგა ერთში, “ლიონთან” დამარცხდნენ (0:1). წარუმატებელმა შედეგებმა ფრანგი სპეციალისტის გუნდიდან შესაძლო გაშვების შესახებ ხმების გავრცელება გამოიწვია, მაგრამ ალ ხელაიფი მას ნდობას კვლავ უცხადებს.

“ძალიან გამიკვირდა, როდესაც ჩვენს მწვრთნელთან დაკავშირებით გავრცელებულ ინფორმაციას გავეცანი. ბლანი პსჟ-ს მწვრთნელად რჩება. პირადად ვიზრუნებ იმაზე, რომ ის ჩვენთან დიდი ხნის განმავლობაში დარჩეს. ამ აზრზე “ჩელსისთან” გამართულ მატჩამდე ვიყავი და მას შემდეგ პოზიცია არ შემიცვლია. ლორან ბლანს, ხელმძღვანელობის მხრიდან, სრული მხარდაჭერა აქვს და მას საკუთარი საქმის მშვიდად კეთება შეუძლია.” – აცხადებს ნასერ ალ ხელაიფი.