ქალთა რეიტინგსიის პირველი ნომერი და უიმბლდონის ტურნირის მოქმედი ჩემპიონი სერენა უილიამსი წლევანდელი შეჯიბრების მესამე წრეში ძალდაუტანებლად გავიდა. 31 წლის სერენამ თინეიჯერ ფრანგ კაროლინ გარსიას (19 წლისაა) 6:3, 6:2 მოუგო და მეთექვსმეტედფინალში იაპონელ კიმიკო დატე-კრუმს შეხვდება.

კლასიფიკაციის მეასე ნომერ ფრანგის დამარცხებას უილიამს-უმცროსმა საათი და 7 წუთი მოანდომა. სერენამ 4 ბრეიკი და 9 ეისი შეასრულა, გარსიას აქტივში კი მხოლოდ 3 ეისია. დღევანდელი მოგების შედეგად სერენამ კაროლინთან ურთიერთშეხვედრების ანგარიში 2:0 გახადა.

უილიამსის მომდევნო ოპონენტი კიმიკო დატე-კრუმი 42 წლისაა და 1996 წლიდან მოყოლებული პირველად გავიდა უიმბლდონის მესამე წრეში. მეტიც, 1996-ში იგი მეთექვსმეტედფინალს არ დასჯერდა და იმ წელს ნახევარფინალამდეც კი გააღწია. იაპონელის ასაკისა და სერენას ფორმის გათვალისწინებით, წლეულს ეს არარეალური ჩანს, თუმცა, გუშინ და გუშინწინ უიმბლდონზე იმდენი მოულოდნელი რამ მოხდა...