“ტოტენჰემის” ნახევარმცველმა პაულინიომ ერთ-ერთ ბრიტანულ გამოცემასთან ინტერვიუში აღიარა, რომ კლუბში თავისი ამჟამინდელი ყოფით უკმაყოფილოა. ბრაზილიელი ლონდონში ზაფხულში გადაბარგდა და თავიდან თითქოს ყველაფერი კარგად იყო, მაგრამ “ტოტენჰემიდან” მთავარ მწვრთნელ ანდრე ვილაშ-ბოაშის წასვლისა და მის ნაცვლად ტიმ შერვუდის დანიშვნის შემდეგ ძირითად შემადგენლობაში ადგილი დაკარგა. ამასთან, შერვუდის კრიტიკის ობიექტიც გახდა.

“ჩემთვის ძნელი ასახსნელი იყო, რატომ გაუშვეს ვილაშ-ბოაში – ციტირებს პაულინიოს სიტყვებს The Guardian – გუნდში მან მიმიწვია და მისი წასვლით იმედგაცრუებული დავრჩი. შერვუდმა ცვლილებები განახორციელა. ყველა მწვრთნელს თავისი სტილი აქვს. მისი სტილი კი ფეხბურთელების სახალხოდ გაკრიტიკებაა. ცხადია, ეს სასიამოვნო არაა, მაგრამ გუნდის დამრიგებელია და მის გადაწყვეტილებას პატივი უნდა ვცე. თუმცა სათამაშო პრაქტიკის ნაკლებობით უკმაყოფილებას ვერაფრით დავმალავ”.