“ნიუკასლის” ხელმძღვანელობამ მთავარი მწვრთნელი ალან პარდიუ 100 ათას გირვანქა სტერლინგით დააჯარიმა. სპეციალისტს პრემიერლიგის 28-ე ტურში, “ჰალთან” მატჩისას (4:1) მომხდარი ინციდენტი არ აპატიეს. პარდიუმ მეტოქე გუნდის ნახევარმცველ დევიდ მეილერისთვის თავით დარტყმა სცადა, როდესაც ამ უკანასკნელმა მინდვრის ხაზს მიღმა გადავარდნილი ბურთის აღება და აუტის მოწოდება დააპირა. მსაჯმა “ნიუკასლის” დამრიგებელი წითელი ბარათით დასაჯა.

ფულადი სანქციის გარდა კლუბმა 52 წლის სპეციალისტს მკაცრი გაფრთხილებაც მისცა. გამორიცხული არაა, ამ ყველაფერს ინგლისის ფეხბურთის ასოციაციის სასჯელიც დაემატოს, რომელმაც ინციდენტის გამოძიება მოითხოვა. ალან პარდიუმ მომხდარის გამო უკვე ოფიციალურად მოიხადა ბოდიში.