აბუ დაბის დიდი პრიზის მესამე დღეს საქართველოს ძიუდოისტთა ნაკრებმა 2 მედალი მოიპოვა. მართალია ჯერ მამაკაცთა ბოლო სამ წონაში: 90, 100 და +100 კილოგრამებში სამეულები სრულად არ შევსებულა, მაგრამ ვარლამ ლიპარტელიანმა (90 კგ) და ზვიად ხანჯალიაშვილმა (+100 კგ) არაბულ კვარცხლბეკზე ასვლა უკვე გაინაღდეს.
ლიპარტელიანი ფინალშია და ჩემპიონობასა და 200 სარეიტინგო ქულას შვედი მარკუს ნიმანის ძლევაღა აშორებს. ხანჯალიაშვილი კი ნახევარფინალში სამხრეთკორეელ სუნგ-მინთან დამარცხდა და ბრინჯაოს პრიზიორი გახდა. ამასთან პირად რეიტინგს 80 ქულაც შემატა. მძიმე წონაში ტატამზე კიდევ ერთი ქართველი - ადამ ოქრუაშვილიც გავიდა, მაგრამ პირველსავე წრეში წააგო მომავალ ფინალისტთან, ჰოლანდიელ ლუუკ ვერბიჟთან.
დღესვე მედლები 100 კილოგრამ წონით კატეგორიაშიც თამაშდება, მაგრამ ამ წონაში საქართველოს ნაკრებს მონაწილე არ ჰყავს.
 

ოთარ მაღლაკელიძე