მადრიდის “ატლეტიკოს” ფორვარდი დავიდ ვილია მომდევნო სეზონიდან აშშ-ს კლუბ “ნიუ იორკ სიტიში” ითამაშებს. მადრიდელთა ოფიციალურ საიტზე 32 წლის ესპანელის ვიდეომიმართვა გამოქვეყნდა, სადაც თავდამსხმელი გულშემატკივრებს დაემშვიდობა.
“ატლეტიკოში” თამაში ჩემთვის დიდი გამოცდილება იყო. მადრიდში ფეხბურთელებს შორის ბრწყინვალე დამოკიდებულებაა და აქ თამაში კომფორტულია. გარდა ამისა, “ატლეტიკოს” შესანიშნავი ქომაგები ჰყავს. ეს კლუბი სიცოცხლის ბოლომდე მემახსოვრება”, - განაცხადა ვილიამ.
ცნობისათვის, ესპანეთის პრიმერა დივიზიონის გასულ სეზონში, ვილიამ 36 მატჩი ჩაატარა და 13 გოლი მიითვალა, რითაც თავის გუნდს ჩემპიონის ტიტულის მოპოვებაში დაეხმარა. გარდა ამისა, ვილია უეფას ჩემპიონთა ლიგის ვიცე-ჩემპიონიც გახდა.
