რამდენიმე წუთის წინათ ოფიციალურად დადასტურდა ინფორმაცია, რომლის თანახმადაც, “მანჩესტერ იუნაიტედის” ახალი მთავარი მწვრთნელი ლუი ვან გაალი იქნება.

უკვე დიდი ხანია ვრცელდება ინფორაცია, რომ “მანჩესტერის” მთავარი მწვრთნელის პოსტზე დევიდ მოიესს ვან გაალი შეცვლის. დღეს კი ცნობილი გახდა, რომ 62 წლის ჰოლანდიელმა სპეციალისტმა “წითელ ეშმაკებთან” 3-წლიანი კონტრაქტი გააფორმა. ვან გაალი “მანჩესტერში” მუშაობას მსოფლიოს ჩემპიონატის შემდეგ დაიწყებს. ამის მიზეზი ისაა, რომ ბრაზილიაში გასამართ მუნდიალზე ის ჰოლანდიის ეროვნულ ნაკრებს უთავკაცებს.

ლუი ვან გაალი გამოცდილი მწვრთნელია. მან ეს საქმიანობა 1991 წელს დაიწყო. ვან გაალს “აიაქსში”, “ბარსელონაში”, “ალკმაარში”, “ბაიერნსა” და ჰოლანდიის ნაკრებში უმუშავია. მან 4-ჯერ ჰოლანდიის ჩემპიონატი, 2-ჯერ ქვეყნის თასი, 3-ჯერ სუპერთასი, ერთხელ ჩემპიონთა ლიგა, ერთხელ უეფას თასი, 2-ჯერ უეფას სუპერთასი, ერთხელ საკონტინენტთაშორისო თასი, 2-ჯერ ესპანეთის ჩემპიონატი, ერთხელ ესპანეთის თასი, ასევე თითოჯერ გერმანიის ჩემპიონატი, თასი და სუპერთასი მოიგო.

იმ მწვრთნელებს შორის, რომლებსაც ჩემპიონთა ლიგაზე 50 თამაშზე მეტი ჩაუტარებიათ, ვან გაალი ყველაზე წარმატებულია. მისმა გუნდებმა მატჩების 62% მოიგეს.