მილანის “ინტერის” გაყიდვის პროცესი დღეს ოფიციალურად დასრულდა და “ნერაძურის”, ერიკ ტოჰირის სახით, ახალი პრეზიდენტიც ჰყავს.

“ინტერის” ოფიციალური ვებგვერდის ცნობით, კლუბის აქციების 70% კომპანია International Sports Capital-მა შეიძინა, რომელსაც ერიკ ტოჰირი, როზან როესლანი და ჰანდი სოეტეჯო ფლობენ. 29.5% მასიმო მორატის საკუთრებაში რჩება, ხოლო დანარჩენი აქციები წვრილ აქციონერებზეა გადანაწილებული.

დღესვე მოხდა კლუბის დირექტორთა საბჭოს ახალი შემადგენლობის დაკომპლექტება. “ინტერის” დირექტორთა საბჭო 8 წევრისგან შედგება და ესენი არიან: ერიკ ტოჰირი, როზან როესლანი, ჰანდი სოეტეჯო, ტომას შრევე, ჰიოი ისენტა, ანჯელომარიო მორატი, რინალდო გელფი და ალბერტო მანცონეტო. აქამდე იყო მოსაზრება, რომ პრეზიდენტის პოსტზე მასიმო მორატის დატოვების საკითხი განიხილებოდა, მაგრამ კლუბის ახალ პრეზიდენტად ერიკ ტოჰირი აირჩიეს, ხოლო მორატის წილად საპატიო პრეზიდენტის წოდება ხვდა.

მასიმო მორატი “ინტერის” მესაკუთრე 1995-2013 წლებში იყო. ამ დროის განმავლობაში, მან გუნდის ტრანსფერებს დაახლოებით 600 მილიონი ევრო მოახმარა. მორატის პრეზიდენტობის დროს “ინტერმა” 5-ჯერ სკუდეტო, 4-ჯერ იტალიის თასი, 4-ჯერ ქვეყნის სუპერთასი, ერთხელ ჩემპიონთა ლიგა, ერთხელ მოსფლიოს საკლუბო ჩემპიონატი და ერთხელაც უეფას თასი მოიგო.