აშშ-ს ქალაქ ფორტ ბენინგში სპორტული პისტოლეტიდან სროლაში დასრულებულ მსოფლიოს თასის გათამაშებაში, ნინო სალუქვაძემ ვერცხლის მედალი მოიპოვა.

ქართველმა ოლიმპიურმა ჩემპიონმა საკვალიფიკაციო ეტაპზე არცთუ ისე კარგად იასპარეზა და 581 ქულით ნახევარფინალში ბოლო, მერვე ადგილით შევიდა.

გადამწყვეტ მომენტში ნინო სალუქვაძემ კონცენტრაცია მოახერხა და 17 ქულით ფინალში სროლის უფლებაც მოიპოვა, სადაც გამარჯვებამდე სულ ცოტა დააკლდა.

შვეიცარიელ ჰაიდი დიჩელმი-გერბერთან დაპირისპირებისას პირველი ოთხი სერიის შემდეგ ანგარიში 4:4 იყო, შემდეგ კი უკვე შვეიცარიელმა იყოჩაღა და 8:4 მოიგო.

www.geonoc.org.ge