ევროპის 2013 წლის ჩემპიონატზე ჯგუფური ეტაპის ვერდაძლევის მიუხედავად, საქართველოს 19 წლამდე ნაკრების ცენტრალურმა მცველმა ნიკა სანდოხაძემ, უეფას ოფიციალურ ვებგვერდთან საუბარში განაცხადა, რომ ქართული ფეხბურთის მომავალს ნათელ ფერებში ხედავს.

თავდაპირველად, ქუთაისის “ტორპედოს” მცველი თურქებთან ჩატარებულ ჯგუფური ეტაპის დასკვნით მატჩს შეეხო:

“თამაში ძალიან კარგად დავიწყეთ და დავწინაურდით. ყველაფერს ვაკეთებდით, რაც მწვრთნელმა მატჩამდე დაგვავალა, მაგრამ სამწუხაროდ, თურქებს საპასუხო გოლი გავატანინეთ და ყველაფერი წყალს გავატანეთ. ვგრძნობდით, რომ თურქებთან სათამაშოდ მზად ვიყავით. ვიცოდით, რომ მეტოქე ასი პროცენტით დაიხარჯებოდა, რათა ორი თამაშის წაგების შემდეგ, გაემარჯვა. განვლილი თამაში თურქებისთვის ძალიან მნიშვნელოვანი იყო და საბოლოოდ, კიდეც გაიმარჯვეს”.

ნახევარფინაში გასასვლელად, ბოლო შეხვედრაში, გარდა იმისა, რომ საქართველოს თურქები უნდა დაემარცხებინა, ფრანგებს სერბებთან უნდა წაეგოთ. სანდოხაძის თქმით, პარალელურად მიმდინარე დაპირისპირებაში განვითარებულ მოვლენებზე, მათ ყველაფერი იცოდნენ, რადგან თამაშს თვალს დისკვალიფიცირებული ბაჩანა არაბული ადევნებდა.

“იმ მატჩის მსვლელობის შესახებ ყველაფერი ვიცოდით, რადგან გუნდის დისკვალიფიცირებული კაპიტანი ბაჩანა არაბული, მას თვალს ტრიბუნიდან ადევნებდა. ამის მიუხედავად, ჩვენთვის თურქებთან შეხვედრა ძალზე მნიშვნელოვანი იყო”.

სანდოხაძის განცხადებით, სამ მატჩში ერთი ქულის აღების მიუხედავად, ევროპის ჩემპიონატზე მონაწილეობით ბედნიერია, რადგან ბევრი სასარგებლო რამ გაიგო:

“ჩვენთვის, ევროპის საუკეთესო 8 გუნდში ყოფნა უდიდესი მიღწევაა. საქართველოს დამოუკიდებლობის პერიოდში, 19 წლამდელთა ნაკრები ევროპის ჩემპიონატზე პირველად მოხვდა და ქვეყნისთვის ეს ძალიან მნიშვნელოვანია. დარწმუნებული ვარ, ტურნირზე მიღებული გამოცდილება მომავალში გამოგვადგება. იმედია, ეს გამოცდილება 21 წლამდე ნაკრებში და შესაძლოა, ეროვნულ გუნდში მოხვედრის შემთხვევაშიც გამოგვადგეს”.