იტალიური “ნაპოლი” 30 წლის თავდამსხმელის, გორან პანდევის გაშვებას და მის ნაცვლად “ლიონის” ახალგაზრდა შემტევის, ალექსანდრ ლაკაზეტის მიწვევას აპირებს. ამ ინფორმაციას Il Mattino ავრცელებს.

აპენინური პრესის ცნობით, ნეაპოლელთა მთავარი მწვრთნელი რაფაელ ბენიტესი შემადგენლობის გაახალგაზრდავებას აპირებს და მაკედონელი შემტევი მის გეგმებში აღარ შედის.

პანდევმა, სერია A-ს მიმდინარე გათამაშებაში, 25 თამაში ჩაატარა, აქედან 15-ჯერ ის სასტარტო შემადგენლობაში იყო. 30 წლის ფეხბურთელის ანგარიშზე 6 გოლი და 4 შედეგიანი გადაცემაა.

მაკედონელი თავდამსხმელის შემცვლელად “ნაპოლი” “ლიონის” 22 წლის ფეხბურთელს, ალექსანდ ლაკაზეტს მოიაზრებს, რომელმაც მიმდინარე სეზონში საგრძნობლად მოუმატა. ლიგა ერთის გასულ გათამაშებაში მას მხოლოდ 3 გოლი ჰქონდა გატანილი, მიმდინარე სეზონში კი, ახალგაზრდა შემტევმა თავი უკვე 14-ჯერ გამოიჩინა. ამისთვის მას 29 თამაშის ჩატარება დასჭირდა.