ნაგოიაში მიმდინარე ივლისის ბაშომ ეკვატორი გადალახა. 8 დღის თავზე ელიტარულ მაკუუჩი დივიზიონს დანაკარგის გარეშე იოკოძუნა ჰაკუჰო, ოძეკი კოტოშოგიკუ და რიგითი მაეგაშირა ტაკაიასუ ლიდერობენ.

თანაბარი ბალანსი (4 მოგება, 4 წაგება) გააჩნია გაგამარუს შიკონათი ცნობილ თეიმურაზ ჯუღელს. გასულ დღეებში ქართველმა გოლიათმა აღმოსავლეთის მე-12 მაეგაშირა კიოკუტენჰოს სძლია, შემდეგ კი ძურიოს პირველ ნომერ სადანოფუჯისთან დამარცხდა.

შეგახსენებთ, რომ გაგამარუს აღმოსავლეთის მე-15 მაეგაშირას წოდება გააჩნია და აუცილებლად დადებითი ბალანსი (კაჩი-კოში) სჭირდება, რათა მაკუუჩიში ადგილი შეინარჩუნოს.

რანგით მე-2 ძურიოს დივიზიონში 7 გამარჯვება და 1 წაგება მოუგროვდა ტოჩინოშინის შიკონათი ცნობილ ლევან გორგაძეს. აღმოსავლეთის მე-12 ნომერმა ქართველმა შაბათა-კვირას 2 მოგება მიითვალა, ჯერ – მე-10 ნომერ დაიდოსთან, შემდეგ კი – მე-8 ნომერ ასაშიჰოსთან.

ნაგოიას ბაშოს მე-9 დღეს ტოჩინოშინი მე-11 ნომერ აკისეიამას გაეჯიბრება, გაგამარუს მეტოქე კი აღმოსავლეთის მე-13 მაეგაშირა ოკინოუმი იქნება.