რაფაელ ნადალმა მონტე კარლოს მასტერსთიხნარობის ნახევარფინალში თანამემამულე დავიდ ფერერს (#11) სძლია და ახლა თავისი ზედიზედ მე-6 იქაური ტიტულისთვის კიდევ ერთ თვისტომს, ფერნანდო ვერდასკოს დაუპირისპირდება.
23 წლის მალიორკელმა, რომელსაც შარშანდელი მაისის შემდეგ არც ერთი ტურნირი არ მოუგია, 5 წლით უფროს მეტოქეს დამაჯერებლად – 6:2 6:3 – აჯობა. ფერერმა ვერაფერი გააწყო ნადალის მძლავრი და უშეცდომო გარჯის წინააღმდეგ.
ეს მათი მე-13 შეხვედრა გახლდათ და რაფა დავიდთან პირად დავაში უკვე 10:3 დაწინაურდა. ამ მოგებით მან მონტე კარლოს თიხნარზე მიჯრით 31-ე გამარჯვება მიითვალა, 32-ის მითვლას კი ის კარიერის 49-ე ფინალში – როგორც თავშივე გაუწყეთ, მისებრ ცაცია თანამემამულის, ვერდასკოს, წინააღმდეგ – ეცდება.
ამ უკანასკნელმა მოულოდნელად იოლად დაამარცხა ტურნირის შარშანდელი ფინალისტი და წლეულს პირველ ნომრად განთესილი ნოვაკ ჯოკოვიჩი 6:2 6:2. 22 წლის სერბმა ისედაც რიგიანად მობურთალ ვერდასკოს საქმე თავისი უნებლიე შეცდომებით კიდევ უფრო გაუადვილა.
აღსანიშნავია, რომ ერთ მატჩში მხოლოდ 4 გეიმი ნოვაკს აქამდე არასოდეს დაეგროვებინა, ამაზე ნაკლები კი – ერთხელ, 2005 წლის ავსტრალიის ღია პირველობის პირველ წრეში, რუს მარატ საფინთან 0:6 2:6 1:6 წაგებულ შეხვედრაში!
ვერდასკომ თავის მე-11 ფინალს უწია და იქ მე-7 ტიტულისთვის იბრძოლებს. რაფას კი შანსი აქვს, კარიერის 37-ე ტიტულის მოგებასთან ერთად გახდეს მეორე მეჩოგნე ტურნირის 104-წლოვან ისტორიაში, ვისაც იქ ჯამში 6-ჯერ უმარჯვია. პირველი ინგლისელი რეჯი დოჰერტი გახლდათ, რომელმაც მონტე კარლოს თიხნარზე საჩემპიონო ჯილდო 1897-99 და 1902-04 წლებში შემართა.
ამასთან, რაფა გამარჯვების შემთხვევაში მასტერსის სერიის ტურნირებზე მოხვეჭილი ტიტულების რაოდენობით (16) შვეიცარიელ როჯერ ფედერერს გაუთანაბრდება. შეგახსენებთ, ამ სერიის შეჯიბრებებზე ყველაზე მეტი – 17 – ტიტული ამერიკელ ანდრე აგასის მოუნაგრავს.
ნადალი და ვერდასკო ერთმანეთს 9-ჯერ შეხვედრიან და 9-ჯერვე გამარჯვებული რაფა დარჩენილა.
ესპანური ფინალი კი მონტე კარლოში 2002 წლის მერე აღარ გათამაშებულა. იმ წელს იქ გადამწყვეტ მატჩში ხუან კარლოს ფერერომ და კარლოს მოიამ იპაექრეს და ტიტული პირველს ერგო.