მსოფლიო რეიტინგის მეხუთე ნომერი ჩინელი ნა ლი წარმატებით განაგრძობს ასპარეზობას მაიამიში მიმდინარე მასტერსზე. მესამე წრის მატჩში 31 წლის ჩოგბურთელმა ყველანაირი პრობლემების გარეშე, ორ სეტში დაამარცხა კორტების მასპინძელი ვარვარა ლეპჩენკო 6:2, 6:4.

შეხვედრა 1 საათსა და 18 წუთს გაგრძელდა და ამ დროის განმავლობაში ლიმ ოთხჯერ დააბრეიკა მეტოქე, საკუთარი ჩაწოდება კი მხოლოდ ერთხელ დათმო. ჩინელი ჩოგბურთელი ანგარიშზე 3 ეისიც გახლდათ, ხოლო მისმა მეტოქემ ერთი ეისის წილ 3 ორმაგი შეცდომა დაუშვა. დღევანდელი მატჩი ამ ჩოგბურთელთა კარიერაში პირველი ურთიერთდაპირისპირება გახლდათ.

ტურნირის მეოთხე წრეში ნა ლი კაროლინ ვოზნიაცკისა და გარბინ მუგურუსა-ბლანკოს შორის გამარჯვებულს დაუპირისპირდება.