ევროპულ პრესაში გავრცელებული ინფორმაციის თანახმად, ლუის სუარესმა “ლივერპულის” დატოვება და კარიერის ესპანეთში გაგრძელება გადაწყვიტა, ხოლო თუ კატალონიურ Mundo Deportivo-ს დავუჯერებთ, ურუგვაელმა არჩევანი “ბარსელონაზე” შეაჩერა.

კატალონიელი ჟურნალისტების ცნობით, სუარესმა “ბარსელონა” იმიტომ აირჩია, რომ მისი მეუღლის, სოფია ბალბის მშობლები ქალაქ ბარსელონადან 24 კილომეტრში ცხოვრობენ. ურუგვაელი ვარსკვლავის სიმამრი, გუსტავო ბალბი კი შემდეგს აცხადებს: “ლუისს ინგლისში აღარაფერი აქვს დასამტკიცებელი. ესპანეთში გადასასვლელად კარგი დროა. “ბარსელონა” თუ “რეალი”. ამას მნიშვნელობა არ აქვს. “ლივერპულის” მიმართ არსებული პატივისცემის გამო, სუარესი სხვა ინგლისურ გუნდში არ გადავა.”

გავრცელებული ინფორმაციით, “ლივერპული” სუარესს ესპანეთში 65 მილიონ ევროდ გაუშვებს. კატალონიელები მზად არიან ინგლისელებს 40 მილიონი და ალექსის სანჩესი შესთავაზონ, ხოლო “რეალი” თანხას სრულად იხდის.