მადრიდის “რეალის” დამრიგებელმა ჟოზე მოურინიომ, რომელიც სეზონის დამთავრებისთანავე დატოვებს სამეფო კლუბს, “ჩელსის” ხელმძღვანელობასთან კონტრაქტის პირობები შეათანხმა. პორტუგალიელი “არისტოკრატებთან” ოთხწლიან ხელშეკრულებას გააფორმებს და ინგლისური ფეხბურთის ისტორიაში ყველაზე მაღალანაზღაურებადი მწვრთნელი გახდება. The Sunday Times-ის ცნობით, “განსაკუთრებული” (Special  one – ასე ეძახიან მას ხუმრობით ინგლისში) ლონდონში, დაბეგვრის გამოკლებით, წელიწადში 8,5 მილიონ გირვანქას მიიღებს. მას კონტრაქტი ჯერ არ გაუფორმებია, თუმცა ეს პრიმერადივიზიონის 38-ე ტურის შემდეგ მოხდება.

ასევე, მოურინიო სრულ თავისუფლებას მიიღებს გუნდის გადახალისების მხრივ, თუმცა, ვარაუდობენ, რომ რადიკალურ ცვლილებებს არ მოახდენს, მას მხოლოდ თითო ცენტრალური მცველი, ნახევარმცველი და თავდამსხმელი სჭირდება.