ინგლისურ პრესაში გავრცელებული ინფორმაციის თანახმად, ჟოზე მოურინიომ ლონდონის “ჩელსის” ხელმძღვანელობას 3 პირობა წაუყენა, რომელთა შესრულების შემთხვევაშიც, პორტუგალიელი ინგლისის დედაქალაქში დაბრუნებას დასთანხმდება.

მოურინიოს “რეალიდან” შესაძლო წასვლის შესახებ ხმების გავრცელება არ წყდება. გავრცელებული ინფორმაციით, მას “პარი სენ ჟერმენი”, “მანჩეტერ სიტი” და “ჩელსი” იწვევენ. Mირრორ-ის ცნობით, თუ ამ უკანასკნელს პორტუგალიელის დაბრუნება სურს, 3 პირობა უნდა შეასრულოს.

პირველი მოთხოვნა ფინანსურ მხარეს ეხება. მოურინიო წელიწადში 12 მილიონ ფუნტს ითხოვს, რაც მის მადრიდულ ხელფასს 2 მილიონით აღემატება.

პორტუგალიელის მე-2 მოთხოვნა ფრენკ ლემპარდის შენარჩუნებაა. 34 წლის ნახევარმცველს, რომელიც მოურინიოს ერთ-ერთი ფავორიტი ფეხბურთელია, კლუბთან კონტრაქტი მიმდინარე სეზონის ბოლოს უმთავრდება და მისი მომავალი კვლავ გაურკვეველია.

გარდა ამისა, მოურინიო ითხოვს, რომ გუნდი ინგლისის 4 საუკეთესო კლუბს შორის მოხვდეს, რათა მომდევნო სეზონში, ლონდონელებმა ჩემპიონთა ლიგაზე ითამაშონ. ამჟამად, “ჩელსი” სწორედ მე-4 ადგილზეა. ის კიდევ 2 ლონდონურ გუნდს შორისაა მოქცეული, რომლებთანაც “არისტოკრატებს” 2-2 ქულა აშორებთ.

შეგახსენებთ, რომ ჟოზე მოურინიო “ჩელსიში” 2004-07 წლებში მუშაობდა. ამ დროის განმავლობაში, მან ორ-ორჯერ პრემიერლიგა და ლიგის თასი, ხოლო თითოჯერ ასოსიაციის თასი და ქომუნითი შილდი მოიგო.