ფლორენციის “ფიორენტინას” მთავარმა მწვრთნელმა ვინჩენცო მონტელამ “ინტერთან” მატჩის (1:2) პრესკონფერენციაზე აღნიშნა, რომ მისი გუნდი გადაღლილია, მაგრამ კონკრეტულ თამაშში წაგებას არ იმსახურებდა.
“ვფიქრობ, “ინტერს” პირველი ტაიმი უნდა მოეგო, რადგან ინიციატივას ფლობდა. შესვენების შემდეგ კი ჩვენ უკეთ გამოვიყურებოდით. სახიფათო მომენტებიც შევქმენით და ანგარიშის გათანაბრებაც შეგვეძლო, მაგრამ იღბალმა ზურგი გვაქცია. ამას ჩვენს კარში თამაშგარედან გატანილი გოლიც დაემატა და თამაშის გადასარჩენად ენერგია აღარ გვეყო. იტალიის თასზე, “უდინეზესთან” ჩატარებული მატჩის შემდეგ გუნდმა ძალების ბოლომდე მოკრება ვერ მოასწრო. წინ კი ევროპის ლიგის შეხვედრა გველის” – ციტირებს მონტელას სიტყვებს Sky Italia.
