“მანჩესტერ იუნაიტედის” მთავარმა მწვრთნელმა პრემიერლიგის 21-ე ტურში “სუონსის” 2:0 ძლევის შემდეგ გაკეთებულ კომენტარში ძირითადი ყურადღება შესანიშნავ ქომაგობასა და რამდენიმე ფეხბურთელის კარგ თამაშზე გაამახვილა. შეგირდთაგან კი განსაკუთრებულად ახალგაზრდა ფლეიმეიკერი ადნან იანუზაი გამოარჩია.

“დღეს კარგად ვითამაშეთ, რაშიც მაყურებლის საოცარი მხარდაჭერა ძალიან დაგვეხმარა. პირველი ათი წუთი მშვენივრად ჩავატარეთ. შემდეგ კი ცოტა მოვდუნდით და “სუონსს” ამოსუნთქვის საშუალება მივეცით. შესვენების შემდეგ მოედნის ცენტრზე კონტროლი გავაძლიერეთ, რაც მნიშვნელოვანწილად შინჯი კაგავას დამსახურებაა. ადნან იანუზაი კი ფანტასტიკური იყო. ამ ფეხბურთელს შემტევ ხაზში ნებისმიერ პოზიციაზე თამაში შეუძლია. კარგია, რომ ეს ახალგაზრდა “მანჩესტერ იუნაიტედის” ფეხბურთელია” – განაცხადა მოიესმა.